Les primeres noticies que se conocen sobre la esistencia d'una banda de música en Candás daten del añu 1880. Sicasí, l'empiezu formal de la banda como la conocemos anguaño, arrincó cola constitución de l'Asociación de Mareantes del Muelle de Candás, cuando dicha asociación decidió subvencionar al organista de la ilesia pa qu'enseñara de baldre música a los fíos y fíes de persones socies que lo solicitaren.

Esta formación pasó por grandes dificultaes dende la so creación que supunxeron dellos cambios de directores, problemes económicos, de material (instrumentos, uniformes, etc) llegando inclusive a la disolución de la banda en más d'una ocasión.

Una d'estes disoluciones produzse nos difíciles años de la Guerra Civil, cuando la banda pasó a ser militarizada y el so director daquella, José Antuña Argüelles (director mientres 32 años), nun pudo evitar la lóxica dispersión de los miembros de la mesma.

Nel añu 1948, los esfuerzos d'un grupu d'entusiastes carreñenses ficieron que l'agrupación volviere renacer y, anque con altibaxos, caltúvose hasta los nuestros díes.

A partir del 1985  l'agrupación consolidóse gracies al llogru d'importantes subvenciones que permitieron la renovación de materiales y la participación en diversos festivales y eventos que-y otorgaron un ciertu prestixu.

El despegue de la banda nesta dómina, tamién ta motiváu pola incorporación de mozos músicos de reconocíu talentu así como pola participación en proyectos y programes europeos que ficieron que la so popularidá y trabayu aumentare progresivamente fuera de les nuestres fronteres.

Sol mandatu de José Miguel Carrera Álvarez, dende'l 1987, creóse la sección de gaites que tres una etapa d'afitamientu pasó a tener personalidá propia fuera de la banda.

Amás, paralela a la Banda Música de Candás, tamién merez especial consideración la Escuela de Música de dicha banda qu'actúa, non yá como centru de formación sinón como viveru nel que nutrise y garantizar el futuru. Nella, baxo la tutela del profesoráu, danse clases de múltiples instrumentos musicales (sobremanera vientu y percusión).

Por tanto, podemos dicir que l'agrupación Banda Música de Candás sofítase de la so propia escuela  "Oliver Díaz Suárez", onde s'imparten clases de solféu y d'instrumentos que nun solo suponen la incorporación a la banda sinón la preparación pa les pruebes d'accesu a los conservatorios, dexando l'agrupación l'instrumentu pa facilitar l'estudiu musical.

Nel branu del 1997 editóse un CD La música nel cine y otres temes  qu'inclúi vídeos y archivos fotográficos de l'agrupación.

Especialmente significatives fueron tamién les celebraciones del 120 y 125 aniversariu de la Banda Música de Candás nel 2001 y 2006 respectivamente, según la publicación del llibru Miscelánea de apuntes, imágenes y comentarios que recueye una parte de la hestoria de l'agrupación y les principales alcordances de los que fueron parte activa nel so asoceder.

Ente les actividaes musicales de calter especial hai que mentar la organización biañal del Festival Internacional de Pianu "José Luis Vega Pelís", y la del Festival de Bandes de Candás, de la que la so primer edición celebróse nel 2001.

Dende'l 2005 amuesa la dirección de la banda David M. Moen, tubista de la Orquesta Sinfónica del Principáu d'Asturies.  Nacíu nel estáu d'Arkansas, Estaos Xuníos, empezó la so dilatada carrera nel mundu de la música con namás diez años. Llicenciáu en Texas, amplió los sos estudios nel Conservatoriu de San Luis. Múltiples fueron les sos collaboraciones con orquestes en conciertos, grabaciones y festivales en dellos llugares del mundu.

Contactu