La Mata

L'antiguu campu de La Cruz quedó pequeñu nel 1962. Fuere'l campu de xuegu del míticu Canijo FC, antecedente directu del actual Candás Club de Fútbol.

El Canijo FC federóse nel 1934 y empezó a intervenir en tercera rexonal dende la temporada 1934-35.

Tres la postrera de les nuestres guerres civiles, Candás permaneció ensin fútbol federáu hasta l'añu 1948, momentu nel que naz l'actual Candás Club de Fútbol.

El nuevu equipu de la villa hereda'l campu del Canijo, utilizándolu hasta 1962. Na temporada 1961-62 el Candás Club de Fútbol debuta per vez primera na so historia na tercer división.

Nun va competir tola lliga nel campu de La Cruz, yá que va llegar a usar El Miramar de Lluanco en tres ocasiones y antes del final de la temporada va ver inauguráu'l so nuevu campu, terrén de xuegu que pocos años dempués pasaría a denominase campu La Mata, n'honor a José Ramón Fernández González Pepe La Mata, presidente del club ente 1963 y 1966.

El campu fútbol de La Mata entró en funcionamientu na temporada 1961 - 1962 y ye l'actual terrén de xuegu del Candás Club de Fútbol; nél xuega los sos partíos de la tercer división. Pertenez al Principáu d'Asturies y na so dómina foi unu de los meyores campos del fútbol rexonal asturianu, non yá poles sos dimensiones (amplies 100 X 66 metros en yerba) sinón pola comodidá qu'ufiertaba a la hora de los partíos. Dende la temporada 1998 - 99 el campu foi oxetu de reformes, destacando la construcción d'unos vestuarios nuevos. Cuenta con dos graderíos: tribuna cubierta con capacidá pa mil persones, 640 d'elles sentaes, y graderíu descubiertu na portería sur, con capacidá pa otres mil persones.

Col pasu los años, les instalaciones resintiéronse y la tribuna permanez cerrada na actualidá, dempués de qu'un informe técnicu alvirtiere del riesgu d'esbarrumbe de la mesma. Los soportes o planches del graderíu, y les columnes de suxeción tán afectaes, polo que dende'l Conceyu de Carreño tomáronse midíes nel menor tiempu posible (10 díes), per aciu la instalación de 2 tribunes portátiles pa 500 persones, y paralelamente tánse faciendo toles xestiones posibles pal so remocicamientu. Yá se cuenta con un proyectu técnicu y tase por cuenta de la cesión del campu per parte del Principáu.

L'allugamientu del campu ye escelente, a la salida de Candás; con aparcamientu propiu y arrodiáu pol polideportivu municipal, el campu anexu d'entrenamientos y un campu de yerba que ta cedíu anguaño al Victoria CF de Perlora.

Estes instalaciones tamién disponen d'un campu de fútbol d'arena onde se realicen entrenamientos y puen xugase partíos oficiales. De siguío d'esti, podemos  atopar otru campu de yerba con midíes de fútbol-7 y que s'usa sobre manera pa entrenamientos  y pal qu'hai pensáu otru tipu d'actividaes na temporada de branu y fines de selmana como'l so usu por grupos de mozos o otru tipu de persones, interesaes nel esfrute de la instalación.

Gómez Lozana

Esti ye'l campu de fútbol qu'utiliza la Cultural Deportiva Aboño. Ta asitiáu en Les Cruciades (Carrió).

Cuenta con unes midíes de 108 X 69 metros. Ye de yerba natural. Ente les sos instalaciones, que tán debidamente allumaes, podemos atopar vestuarios pa los xugadores, taquiya y una grada cubierta pal públicu.

El so usu ye namás pa la práctica del fútbol.

Victoria

Asitiáu en La Residencia, Perlora, esti campu de midíes reglamentaries de 65 X 105 ye de titularidá y xestión pública anque del so mantenimientu s'encargue'l mesmu equipu que lu usa: el Club Victoria de Perlora.

Ye de yerba natural y tien una grada descubierta pa los espectadores.