Estes instalaciones tán preparaes pa la modalidá de bolu batiente que ye la que se xuega nos conceyos de la zona de la mariña y la zona interior d'Asturies, (anque ente dambes zones esiste dalguna diferencia na construcción de les boleres), tales como: Gozón, Avilés, Castrillón, Sotu'l Barcu, Candamo, Pravia, Grau, Cuideiru, L.luarca y por supuestu, Carreño. Supónse qu'esta ye la modalidá más antigua de les practicaes nesta comunidá autónoma.

Nun s'estrema namás d'otres modalidaes, como la cuatriada, nel tipu d'instalación sinón que tamién cambien les regles del xuegu.

El tiru, en llugar de ser estáticu, como nel restu de disciplines, ye dinámicu, y trátase de tomar carrera (máximo 15 metros) cola bola suxeta ente la palma de la mano, la muñeca y l'antebrazu y llanzar la bola rodando pel rodáu la bola va llegar con muncha fuercia a la llosera o zona de bolos, que tien un poco enclín favorable a la bola p'arriba.

L'oxetivu d'esti llanzamientu ye intentar valtar el mayor númberu de bolos y, amás facer que del golpe dau a los bolos, estos vuelen penriba del ciebu.

La valoración de les xugaes ye la siguiente: cada bolu valtáu na llosera va valir un puntu, 10 puntos o bolos los que queden ente la llosera y el ciebu y 50 puntos los que superen l'altor del ciebu.
Los elementos del xuegu son:

• Zona d'impulsu: ye una zona llana onde se cuerre cola bola pa da-y velocidá. Termina nel encalme. (Mide 15 metros)
• Encalme: llugar onde'l xugador suelta la bola axustándola al rodáu. (1,4 - 2 metros)
• Rodáu:  xune la zona d'impulsu cola llosera, llixeramente alzáu escontra ésta. Perequí la bola avanza rodando. (13-32 metros)
• Llosera: Piedra de forma rectangular sobre la que s'armen los bolos, con enclín pa que facilite qu'éstos salgan despidíos.
• Cabón o ciebu: valla de madera con un altor superior a los 2 metros. Asitiada a 4 metros de la llosera.

Les tres boleres del conceyu respeten estos márxenes y midíes.

Casa Jenaro

La instalación ta asitiada en Prevera, xunto al establecimientu hosteleru que lleva'l so nome; foi remocicada per última vez nel añu 2001.

Esta bolera ye utilizada pa la modalidá de bolu batiente.

Les sos instalaciones son de madera y cuenten con llume, lo que permite'l so usu pela nueche.

Nella, que ye una de les más destacaes d'Asturies, realícense campeonatos a nivel provincial, anque la so actividá principal son los xuegos populares de llanzamientu con bolu non tradicional. Ye la sede de la Peña Bolística Casa Jenaro.

San Zabornín

Magar los sos oríxenes son de fai tiempu abondo, reparóse per última vez nel añu 2002.

Esta bolera cuenta con unes instalaciones qu'inclúin una pista tillada con madera, yá que'l so usu ye'l de la modalidá de bolu batiente.

Asitiada na parroquia d'El Pieloro/Piedeloro, yera la sede de la Peña Bolística de San Zabornín. Ente los sos usos destaca principalmente'l de la práctica de bolu tradicional.

Cuenta con llume propio pa facilitar el so usu en distintes situaciones.

Resbalón (Quimarán/Guimarán - El Valle)

Esta instalación, que ye de creación recién (2007), ta asitiada na redolada del CIR de Quimarán/Guimarán-Valle. Recupera'l nome d'una antigua bolera de batiente qu'esistía na parroquia d'El Valle.

Pa inaugurala fízose'l 21-10-2007 un campeonatu de la modalidá de bolu batiente en collaboración cola Federación de Bolos del Principáu d'Asturies, el Conceyu de Carreño y la Peña Bolística Casa Jenaro.

La bolera va contar con una lleñera y una serie d'aparatos - de llombares, abdominales, de sentadiyes, d'escalada en suspensión, de pulsu y de paraleles - pa la práctica de deporte rural, del que'l so valedor principal nel conceyu ye l'equipu Monte Areo, de Quimarán/Guimarán.

Amás, ta prevista la so cubrición pa esti añu 2008.