Cada añu, na 2ª quincena del mes d'agostu, por mor de la política cultural que'l Conceyu de Carreño entamó na década de los 80, cola organización de xornaes teatrales na cai nos meses de branu, nes que participaron delles compañíes teatrales asturianes (Margen, Teatro del Norte, Compañía Asturiana de Comedias, El Horreo, Xana...), decídese, nel 1991, organizar un Salón de Teatru Costumista Asturianu dientro del CC Teatro Prendes, col envís de da-y puxu a esta faceta artística que daquella espoxigaba otra vuelta.

Dende entós cada añu, na última quincena del mes d'agostu, celebramos un alcuentru cola nuestra cultura teatral cola participación de compañíes teatrales que representen obres d'autores asturianos, o adaptaciones a la cultura asturiana d'obres más universales, siempre con gran asistencia de públicu.

El nuestru salón ye un proyectu afitáu dafechu y podemos mentalu como referente nel panorama teatral asturianu, non solo pola importante cobertura informativa que-y intentamos dar, sinón tamién pola propia promoción del teatru costumista asturianu, del arte teatral tan de nós y que  ye'l  monologuismu, de grupos teatrales "aficionaos", d'actrices y actores asturianos/es y mesmamente de la propia creación teatral más reciente (Carmen Duarte, Pilar Murillo, José Ramón Oliva). L'orixe del 'nuestru salón tien de ver cola tradición teatral asturiana y como non candasina; de fechu, l'actuación de los monologuistes nes fiestes patronales dieron pasu a diálogos y posteriormente a pequeñes representaciones que tuvieron el so allugamientu en delles places y parques de Candás nes décades de los 60, 70 y 80; la intervención del Conceyu de Carreño en 1989, impidiendo'l piesllu del entós priváu Teatro Prendes, apostando por caltener encesu un espaciu cultural y col enfotu de dar un marcu afayadizu (dende un puntu de vista técnicu) a la celebración d'estes actividaes teatrales, xunto cola tradición teatral costumista en Carreño, diéron-y puxu  a  la celebración d'un ciclu teatral nel que diba espeyase lo más gasayoso que tenemos los asturianos/es: la nuestra manera de ser, d'enfrentamos a la vida, la nuestra forma de manifestalo,  siempre allegre y daqué zuniega... y de toes toes, eso espéyase a les clares nel teatru costumista asturianu.

Esti salón de teatru, pioneru de los d'anguaño na nuestra comunidá autónoma, tien l'enfotu, cola participación de delles compañíes teatrales d'aficionaos/es (pero grandes profesionales de la escena) y procedentes de dellos puntos d'Asturies, caltener  la llama de la cultura asturiana encesa a traviés d'una de les sos facetes más desconocíes pal restu d'España: los sos autores teatrales; homes como Eladio Verde, Eloy Fernández Caravera... que supieron retratar nun tonu amable los vieyos tópicos de l'aldea asturiana, personaxes característicos coles sos pequeñes pasiones (amoríos, apaños de "casorios"), trames cencielles, allegres, gayasperes, tipos populares colos sos enguedeyos y pasiones.

Cada añu rindimos homenaxe a los monologuistes asturianos/es, xuglares  daveres de los nuestros tiempos y primeros artífices de lo qu'agora conocemos como teatru costumista asturianu; y nesti sen organizamos un Taller de Monologuismu Cómicu Asturianu ufiertáu pol polifacéticu actor Carlos Alba "Cellero". N'años posteriores al I Salón de Teatru Costumista, fueron amestándose otros aspectos teatrales que nun son propios, como foi'l monologuismu  - orixe mesmu del teatru costumista - na edición de 2000 y mesmamente aspectos novedosos como la zarzuela asturiana na edición del 2001.

Tamién rindimos homenaxe a "Aurora Sánchez" gran dama de la escena teatral asturiana, a traviés de la concesión de los premios honoríficos de teatru costumista asturianu que lleven pa siempre'l so nome.