Nel añu 1990 Carmen Dintén, bibliotecaria de Candás y Mirta Morán, maestra de la zona rural, entamaben la primer biblioteca rural.

Esta allugóse nel edificiu de les antigües viviendes de los maestros, concretamente na parte superior del edificiu de la Escuela Rural de Quimarán/Guimarán - El Valle. Esta infraestructura foi'l primer embrión d'un proyectu qu'espoxigó nel añu 2004, cuando por encargu del alcalde, Ángel Riego, la bibliotecaria candasina ellabora un proyectu de viabilidá d'instalación de pequeñes biblioteques de consulta nos centros d'iniciativa rural, aldees dixitales (telecentros rurales) o escueles rurales del conceyu de Carreño.

La idea cimera d'esti proyectu ye l'aprovechamientu de los recursos culturales y materiales yá esistentes nel conceyu p'algamar una mayor proximidá de los mesmos a la población espardío nel hábitat rural de Carreño. Partiendo de la esistencia d'una biblioteca central na capital (Biblioteca "Carlos González Posada" de Candás), d'unos equipamientos del conceyu distribuíos per toles parroquies y d'una dotación de fondos que provienen del Conceyu de Carreño, la intención ye desarrollar centros o sociedaes de llectura con dos funciones dixebraes:

1. Proporcionar a los/es vecinos/es unos fondos de consulta actualizaos y lo más amplios posibles que permitan que na propia parroquia rural una persona puea facer una consulta sobre un asuntu xeneral ensin tener que dir pa Candás.
2. Valir de ponte pa facer empréstamos ente la biblioteca central de Candás y los/es usuarios/es de les zones rurales. Pa ello sedría interesante contar con un catálogu de fondos de la biblioteca candasina n'internet.

Estes biblioteques públiques -dende'l so entendimientu de serviciu públicu, de baldre y abiertu a toos/es  los/es ciudadanos/es- presenten una riestra  posibilidaes amplia enforma en zones rurales que-yos van permitir convertise nun elementu necesariu dafechu na evolución y desarrollu local y social de la so fastera xeográfica d'influxu.

Tolos centros d'iniciativa rural del conceyu cuenten con un fondu de consulta básicu, tengan o non una biblioteca rural dinamizada con un club de llectura.