Esta biblioteca, que ta asitiada nel pisu superior del edificiu qu'agospien les Escueles de Quimarán/Guimarán - El Valle, foi inaugurada'l 23 d'abril del 1990, coincidiendo col Día del Árbol.

Anguaño, cuenta con 174 socios/es de toles edaes que participen nes sos estremaes y dixebraes actividaes y que van dende l'habitual empréstamu de llibros hasta un club de llectura.

L'empréstamu de llibros faise dos xueves al mes, en concreto'l segundu y el terceru de 17:00 a 19:00 hores; güei, esti procesu ta siendo informatizáu pa meyorar y facilitar el serviciu.

El club de llectura p'adultos, que foi fundáu nel 2004, ye una actividá que se fai los martes a les 18:30 cada 3 selmanes. Anguaño participen nél 14 persones que se ponen d'acuerdu pa lleer un llibru pa llueu entamar un alderique nel qu'amuesen les sos opiniones y impresiones al rodiu del mesmu.

Otra actividá que rescampla ye la de "cuentacuentos". Esta faise'l primer y últimu xueves de cada mes de 5 a 7 de la tarde. Consiste na llectura, per parte del personal encargáu de llibros infantiles, a los/es neños/es asistentes.

Nos sos anicios, la biblioteca contaba con unos 755 exemplares nes sos estanteres. Col pasu los años, estes fueron espoxigando gracies a delles donaciones y  compres feches pola escuela - en bona parte col patrociniu del Conceyu de Carreño - hasta algamar  los 2455 volúmenes de los que dispón anguaño.

La temática de los mesmos ye variada enforma, pudiendo alcontrar dende les habituales enciclopedies hasta comics, pasando per noveles, llibros de consulta y sobre manera llibros pa neños y neñes.