El Teatro Prendes de Candás  inauguróse'l 1 de xineru del 1956 cola película "Cuando ruge la marabunta".

El 30 de xunu del 1989 pasa a ser xestionáu pol Conceyu de Carreño y algama la denominación de Centru Cultural Teatro Prendes.

Años más tarde, concretamente'l mes de xunetu del 1993, col envís d'esparder cualesquier tipu d'actividá socio-cultural dientro de les sos instalaciones y aquelles otres que por espresu encargu pudieren ser desarrollaes nel ámbitu del Conceyu de Carreño, constitúyese'l Patronatu Centru Cultural Teatro Prendes con personalidá xurídica propia y autonomía financiera y funcional, dependiente del Conceyu de Carreño.

Dende los sos anicios desendolca estremaes y abondes  actividaes mensuales: conciertos (música clásica, tradicional, folclórica...), representaciones teatrales, proyecciones cinematográfiques, cursos de teatru y de danza, alderiques, congresos... De toa esta programación tenemos que destacar el nuestru "Salón de Teatru Costumista Asturianu" que tolos branos dende 1991, sobre manera nel mes d'agostu, permítemos ser noticia nel panorama cultural asturianu, asina como'l "Ciclu de Cine de la Mar Albentestate", nel mes de xunetu; el "Festival de Teatru na Cai", el nuestru "Ciclu de Cine Clásicu"

La filosofía de la programación musical del Centru Cultural Teatro Prendes sufrió un cambiu dafechu dando-y puxu a la promoción d'un mayor y meyor conocimientu d'un ampliu abanicu de rexistros musicales; asina, la nuestra intención ye la de dedicar cada trimestre a un tipu  música o d'actividaes musicales específiques:

• Música clásica (1^er trimestre)
• Música folk/asturiana (2^u trimestre)
• Música pop-rock/jazz (3^er trimestre)
• Música y actividaes musicales de Carreño (4^u trimestre);

Toa esta nueva programación inclúyese dende l'añu 2001 nun ciclu añal de música que lleva'l nome xenéricu de "Les 4 Estaciones de la Música", col subtítulu en cada casu de:

1. Estación - iviernu. La música clásica.
2. Estación - primavera. La música asturiana.
3. Estación - branu. Tolos tiempos de la música.
4. Estación - seronda. La música en Carreño.

Asina programamos conciertos didácticos pal alumnáu n'horariu llectivu y en collaboración colos departamentos de música de los centros escolares de Candás.

Falar de la nuestra política teatral ye falar tamién del inxertamientu del Teatro Prendes de Candás nel Circuitu de Teatru Profesional d'Asturies, dende'l so aniciu nel 1999 y del proyectu entamáu na temporada 96-97, la Campaña de teatru pa escolinos/es que nel cursu 2007/2008 celebra la so decimosegunda edición. Esti proyectu pretendía y pretende formar al públicu del futuru, acercar la nuestra mocedá al fenómenu teatral, pero cola sana intención de nun provocar el so refugu; pa ello, ye fundamental una afayadiza elección de les obres, asina como una planificación que consiga que cada alumnu/a gocie del teatru nel nuestru Teatro.

Estudios de reconocíos economistes (Bruno Frey) indiquen a les clares que cuanta más cultura s'ufierta, más cultura se demanda, y eso mesmo ye lo que ta pasando col teatru nel Teatro Prendes de Candás; l'ésitu de públicu del Salón de Teatru Costumista y de la Campaña de teatru pa escolinos/es acarriaron un aumentu nel númberu d'espectadores qu'acuden a les funciones teatrales d'iviernu; d'ehí que dende l'añu 2005, los espectadores tienen la oportunidá d'asistir a una función teatral polo menos una vez al mes. Compañíes teatrales asturianes, como "Factoría Norte", "La Tejedora de Sueños", "Yheppa Títeres" y cómo non "Xana", decidieron estrenar los sos  espectáculos nuevos nel nuestru teatru, y eso supón un nidiu reconocimientu a la nuestra llucha a favor del teatru asturianu, reconocimientu del que mos sentimos agradecíos y arguyosos.

Pa esparder les nuestres actividaes asoleyamos mensualmente 3.500 programes de mano que repartimos directamente nos centros escolares de Candás y Lluanco y tamién nos hoteles y comercios de la zona, mesmamente como 100 carteles a color en cada actividá estra-cinematográfica (yá que disponemos de carteleres  afitaes na rodiada de manera afayadiza), 500 programes de mano en cada actu concretu, cartelera propia nos diarios El Comercio y La Nueva España, asina como cuñes n'Onda Peñes tolos fines de selmana ; ensin escaecer l'atención especial a la promoción del nuestru "Salón de Teatru Costumista Asturianu" con octavielles, carteles, murales (asitiaos de manera afayadiza en Candás y Perlora), programes de mano, cuñes radiofóniques, amplia cobertura na prensa rexonal, al traviés de la Radio-Televisión del Principáu d'Asturies (RTPA), amás de delles emisores de televisión local, ensin escaecer la emisora de radio local "Onda Peñes", onde tenemos una axenda cultural diaria y tamos trabayando nun programa cultural quincenal cola emisión de conciertos y obres teatrales na mesma emisora pola amplia cobertura de la mesma na nuestra rodiada más inmediata: la Mancomunidá d'El Cabu Peñes.

El Teatro Prendes ta acabante cumplir 50 años al pie del cañón, y vamos siguir equí, lluchando y presumiendo de ser los güeyos del cine, la voz de la música y el corazón del teatru.