Na xunta de la Comisión de Mediu Ambiente y Deportes del 22 de xunu del 2001, alcordóse, ente otres, la Declaración Medioambiental de Carreño, informando favoratiblemente de la mesma y proponiendo la so remisión a Plenu pa la so consideración.

Na sesión ordinaria celebrada pol Conceyu Plenu'l 28 de xunu del 2001 adoptóse, fuera del orde del día, previa declaración d'urxencia per unanimidá, la Declaración Ambiental del Conceyu de Carreño, por unanimidá de les persones asistentes, manifestando'l so sofitu a la Carta de les Ciudaes Europees hacia la Sostenibilidá (Carta d'Aalborg).

De la Carta d'Aalborg a Carreño

Nun conceyu como'l de Carreño, onde s'observa una gran implantación industrial y se caltién un importante sector primariu, al empar que se perfila un potencial desarrollu turísticu, motiváu por paisaxes naturales de gran guapura, plantéase d'una manera inevitable la definición de polítiques de xestión municipal que puean regular el desarrollu de toles actividaes dientro del marcu de la sostenibilidá, pa evitar l'agotamientu de los recursos locales.

Pa que los sistemes urbanu, rural y industrial puean ser sostenibles, tienen d'integrase les llinies básiques de xestión, consiguiéndose una sostenibilidá ambiental, económica y social y a última hora, una sostenibilidá local que xenere calidá de vida pa tola población del conceyu d'una manera equitativa.

Asina, dende'l puntu de vista de la sostenibilidá y del desarrollu local, el Conceyu de Carreño asume los compromisos de la Carta d'Aalborg y los adapta a la problemática socioeconómica del conceyu, en materia de mediuambiente, patrimoniu históricu y cultural, turismu, economía y trabayu, sociedá y calidá de vida, y sostenibilidá global.

Dientro del marcu de l'Axenda Local 21 van desarrollase programes y llinies d'acción afayadices a les necesidaes del conceyu, según les demandes sociales definíes nos foros de participación ciudadana, polo que se considera vital la implicación de distintos segmentos sociales, como vecindá, empresariáu de distintos sectores, educadores, personal técnico y representantes de la política.

Entiéndese que tol procesu de sostenibilidá y Axenda Local 21 del conceyu de Carreño ye un procesu a llargu plazu, nel que distintes metes y oxetivos intermedios van llevar al conceyu al equilibriu y integración local.

Asina se van definir actuaciones que faigan que l'Axenda Local 21 nun se quede estancada nuna simple declaración de principios, sinón que treslladen al día a día los principios de sostenibilidá, per mediu d'acciones qu'impliquen una xestión municipal sostenible.

Les llinies d'acción impliquen:

La orientación de la xestión y polítiques municipales hacia'l desarrollu sostenible per mediu de la integración de les polítiques municipales en materia ambiental, económica y social.

Dende esti nuevu modelu de xestión municipal tien de fomentase l'usu racional de los recursos, pa evitar qu'escose, yá que puen agotase. Nesti sentíu, el consumu de recursos materiales, agua, enerxía, usu del suelu, etc., nun han superar la capacidá de renovación natural de los mesmos.

Planes de diseñu d'usos del suelu, de meyora de la eficiencia enerxética y mengua del consumu, aforru d'agua, etc., tienen de tener cabida nel desarrollu futuru del conceyu, al empar que se busca amenorgar la contaminación del mediu, llendando la dependencia en cuantes a enerxíes fósiles; evitando vertíos incontrolaos; per mediu d'una xestión afayadiza de los residuos y evitando la contaminación de suelos, por sobrecarga de los mesmos.

Perfílase la elevada calidá paisaxística y ambiental del conceyu poles sos playes, cantiles y redolada rural tradicional, observándose l'eleváu potencial d'estos valores pa la calidá de vida de la zona y la posibilidá turística como diversificación de la economía, polo que se considera prioritario'l respetu pol caltenimientu de les árees naturales y de la biodiversidá, la correcta planificación de los usos del suelu y la llimpieza y recuperación de vertederos incontrolaos y árees degradaes.

Dientro d'esta calidá paisaxística tienen de considerase gran númberu d'actuaciones antrópiques a lo llargo de la historia, y que de xuru configuren el paisaxe carreñín. Asina, y dao l'altu valor del patrimoniu del conceyu, tien de fomentase la rehabilitación y valorización de los bienes inmuebles, según la recuperación, fomentu y estudiu de tradiciones, toponimia, y etnografía.

Toes estes acciones numberaes, ente otres munches que van dir surdiendo, sofiten el desarrollu ambiental y xeneren unes mires de calidá de vida elevaes, colo que s'apunta hacia la sostenibilidá social, que tamién tien de venir definida pol accesu a los bienes básicos, como son educación, sanidá, vivienda y trabayu, pa lo que se van desarrollar iniciatives municipales qu'apunten al acercamientu de los servicios a les parroquies, a la meyora de la movilidá (tanto pol desarrollu de víes peatonales como pol diseñu de redes de tresporte públiques) y a la identificación col conceyu pola so integración na vida pública y participación en tomar de decisiones.

Dientro de la educación, va facese mención especial a la educación ambiental, sensibilizando a tola población pa buscar la so implicación, yá qu'aceptar un códigu de bones práctiques a títulu personal facilita'l desarrollu de gran númberu d'actuaciones.

Como midida inherente a la educación ambiental trátase de trabayar con colexos y institutos, xunto con asociaciones xuveniles, de tala forma que la mocedá participe y se familiarice cola xestión municipal y l'implantación de l'Axenda Local 21.

Nun pue dexase de llau la sostenibilidá económica, que se va fundamentar nel meyor empléu posible de los recursos propios, amenorgando la dependencia de los esternos, y na diversificación de la economía, anque potenciando los sectores tradicionales.

Asina, iniciatives de turismu rural, formes d'autoempléu (involucraes en programes del tipu de C@rreño Digit@l y l'accesu a nueves tecnoloxíes) y el sofitu a la implantación de nueves empreses qu'acepten les premises locales de sostenibilidá, van favorecer el desarrollu económicu del conceyu y, paralelamente, la calidá y nivel de vida de la población, mientres se respeten los valores ambientales.

Nesti contestu hacia la sostenibilidá local, va participase na global, xestionándose planes y programes de trabayu conxuntos en temes compartíos y baxo'l marcu de l'axenda, mesmamente cooperando con organismos internacionales pa fomentar el desarrollu n'igualdá de posibilidaes de los más desfavorecíos.