El Desarrollu Sostenible defínese como un "desarrollu que satisfái les necesidaes de les xeneraciones actuales ensin poner en peligru la satisfacción de les necesidaes de les xeneraciones futures". Esti procesu supón el caltenimientu de los recursos, el desarrollu económicu viable y el desarrollu social equitativu, al empar que se plantea la recuperación de los usos y costumes, xunto al patrimoniu y cultura de los pueblos.

La Conferencia de Rio de Janeiro nel 1992, define l'Agenda 21 (Axenda 21), como modelu de desarrollu sostenible internacional, cooperando dende cada estáu por un desarrollu sostenible global y equitativu, onde cada estáu, rexón, ciudá y pueblu tien d'encarar la so responsabilidá aplicando l'Axenda 21 a escala local, con proyectos y soluciones a problemes puntuales y específicos que van favorecer el desenvolvimientu conxuntu, al empar que se da un desenvolvimientu local que nun llende, afecte o se realice a consta d'otres comunidaes.

Nel 1992, defínese'l V Programa d'Acción en Materia de Mediu Ambiente na UE Hacia un Desarrollu Sostenible, que busca la integración de les polítiques ambientales nel restu de polítiques económiques y sociales de la UE, como llanza del Desarrollu Sostenible.

La Carta d'Aalborg (Aalborg, Dinamarca 1994), Carta de les Ciudaes Europees pola Sostenibilidá, supón el puntu de partida de les ciudaes y pueblos europeos cara a la sostenibilidá, establecida yá como una prioridá que va de lo local a lo global.

El Conceyu de Carreño, nun apueste decidíu pol futuru, comprometióse na implantación de l'Axenda Local 21, lo que va suponer un importante cambiu estratéxicu nel desarrollu sostenible del conceyu y que'l so oxetivu final va ser la inclusión de la variable medioambiental na ellaboración de polítiques y programes pa la consecución d'un equilibriu duraderu ente'l consumu, la población y la capacidá de sustentu del conceyu.