1. Recursos naturales

Han usase de manera eficiente, ensin superar el ritmu de renovación de los recursos renovables y sustituyendo progresivamente los non renovables. Los planes sostenibles d'esplotación de los recursos locales favorecen el desarrollu económicu del conceyu al empar que se respeten y valoricen los valores ambientales.

2. Contaminación y residuos

El funcionamientu del conceyu nun tien de poner en peligru la salú de les persones nin superar la capacidá de carga y rexeneración del mediu. Tienen de minimizase los niveles de contaminación y la cantidá de residuos; facer una xestión acorde con estándares internacionales y enfocada a una meyora continua, al empar que se recuperen les redolaes degradaes.

3. Biodiversidá

La biodiversidá de la naturaleza tendrá de ser valorada y protexida. Inventariar la fauna y flora esistentes y evitar desnaturalizar los ecosistemes tradicionales tienen de ser puntos básicos de recuperación del equilibriu natural del conceyu. Asina se potencien árees de recuperación d'hábitats naturales frente foriatos (sobre manera mases arbórees autóctones frente plantaciones).

4. Usu del suelu sostenible

Va realizase una distribución equilibrada de los usos del suelu, onde'l suelu industrial nun se desarrolla a cuenta de la naturaleza y sí d'unos usos sostenibles del territoriu, yá que'l suelu ye un recursu finitu. La distribución ente suelu industrial y suelu protexíu pol so valor ambiental, tien d'incluir la variable medioambiental, enfocada a evitar el desarrollu de grandes complexos mui impactantes y desnaturalizadores de la redolada.

5. Patrimoniu históricu.

Ha de protexese y fomentase'l patrimoniu de los pueblos, como un aspectu fundamental de la cultura autóctona, arriquecedora de la población y distintiva, potenciando los usos tradicionales, recuperación toponímica, rehabilitación y valoración de la tradición oral, etc.

6. Economía

La economía local tien de ser diversificada y la dependencia del esterior tien d'amenorgase, cubriendo les necesidaes locales con recursos propios. Asina, siempre que sía posible, les necesidaes tienen de satisfacese sobre manera, con recursos locales, colo que se valoricen y potencien tolos sectores del conceyu.

7. Trabayu

 Toles persones tienen derechu a tener un trabayu remuneráu, con un salariu xustu y contratación estable, fomentándose y sofitándose'l desarrollu de nueves iniciatives d'autoempléu y l'plicación de nueves tecnoloxíes.

8. Accesibilidá a los servicios

Toles persones tienen de tener accesu a los bienes y servicios básicos (salú, vivienda, educación...) y ha poder accedese fácilmente a los servicios de la ciudá, al empar que se protexe'l medioambiente, nun llendando los desplazamientos a la dependencia del vehículu propiu. La descentralización de los servicios en beneficiu de les parroquies tendrá de satisfacer la demanda de la población rural nesta materia lo que, xuntu col desarrollu de nueves tecnoloxíes, llenda l'aislamientu d'estes comunidaes asemeyándoles col mundu urbanu.

9. Igualdá

La igualdá ciudadana tien d'incrementar, desaniciando la probeza, la esclusión y la discriminación, y amenorgando les desigualdaes socioeconómiques, facilitando'l sofitu municipal necesariu pa que la población rural puea acceder n'igualdá de condiciones a los servicios básicos y oportunidaes más desarrollaes nos entornos urbanos.

10. Convivencia

Otru de los oxetivos de l'axenda ye fomentar la convivencia, tien de trabayase en pro de campañes de concienciación ciudadana, sofitu a comunidaes minoritaries, evitar la marxinalidá de grupos, aumentar la capacidá d'acoyida a la inmigración, etc.

11. Vida social y calidá de vida

Toles persones tienen de disfrutar d'una bona calidá de vida, y percibir les sos posibilidaes de meyora, respetando les necesidaes de les xeneraciones presentes y futures, colo que nun se puen llendar les posibilidaes de desarrollu económicu pero ha facese dientro d'un modelu de sostenibilidá. La meyora continua de la calidá de vida tien de suponer l'accesu a cultura, ociu y recréu, a un costu razonable.

12. Participación

Tola población tien accesu a la conocencia, información y técniques necesaries pa poder participar dafechu na comunidá, pudiendo toles secciones de la sociedá participar na toma de decisiones.
La participación ciudadana da un puntu de vista más cercanu al problema, y dexa priorizar el desarrollu d'aquelles polítiques más demandaes. Tolos sectores de la comunidá tienen el derechu y la posibilidá de participar nos procesos de toma de decisiones qu'afecten a les sos vides, colo que s'axiliza la vida política y se perciba la posibilidá d'interactuar cola vida de la comunidá, evitándose la pasividá y indiferencia ciudadana.

13. Sostenibilidá global

El desarrollu sostenible a escala local nun pue facese a costa del impactu n'otros llugares y pueblos del planeta, nin de les posibilidaes de les xeneraciones futures pa satisfacer les sos necesidaes y esfrutar d'un ambiente saludable y diversu. Foméntase'l desarrollu d'una alianza global con otres ciudaes y pueblos pa caltener los sistemes naturales comunes, y pa desaniciar la probeza.