Sobre'l terrén qu'ocupaben les antigües escueles San Félix de Candás y l'edificiu anexu de viviendes pa docentes, proyectóse construyir una edificación d'usos polivalentes que pudiere dar serviciu a les principales necesidaes sociales y culturales del Conceyu de Carreño. El solar, en tando lliberáu del edificiu docente y del edificiu de viviendes que la ocupaben, plantéa-y al proyectista un problema complexu  a la hora de llantar la nueva construcción nel terrén, en resultes de los fuertes desniveles topográficos qu'esisten ente les distintes llendes del solar.

Mesmamente, la implantación de la construcción nun llugar privilexáu tan céntricu na villa de Candás, y los condicionantes de funcionamientu (interrellación) qu'imponen les actividaes múltiples qu'alluga l'edificiu, fueron los principales condicionantes del diseñu de la nueva construcción. Les actividaes previstes pal edificiu impunxeron un programa bien variáu y complexu.

Foi necesario combinar usos bien variaos, con requerimientos espaciales y funcionales, la mayoría les veces tamién bien distintos ente ellos: despachos, oficines, aules con distinta capacidá, sales de xuntes, salón d'actividaes múltiples, sala d'ensayu, sala de xuegos, sala de llectura, cafetería, cocina, baños, vestuarios, etc..., que tienen de compatibilizase y superponese en vertical pa quedar independientes los unos de los otros, pero ensin arrenunciar a la posibilidá de mantener tamién una rellación controlada ente los mesmos.

Tou esti conxuntu de condicionantes arquitectónicos y funcionales obligó a crear un esquema que fuere lo más compactu posible, de máximu aprovechamientu de la superficie construida y na que los sos espacios más amplios en dimensiones son los de rellación y comunicación del edificiu, qu'actúen en tolos casos, tanto normales como escepcionales (ex. en casu d'evacuación del edificiu) como válvules d'escape (descompresión) mientres la evacuación de les persones qu'ocupen l'edificiu.

Los pisos distribúyense alredor d'una escalera que pasa pel tol edificiu y ta asitiada nuna posición casi central pa facilitar l'accesibilidá a tolos pisos y lliberar los espacios próximos a les fachaes, nes que s'asitien los usos previstos nel programa col enfotu de qu'en tolos casos tengan vistes, lluces y ventilación escontra l'esterior.

Nesta posición central tamién s'asitien los servicios técnicos y los baños xenerales, pa facilitar la distribución de los mesmos y cola mesma finalidá anterior, nun restar a otros usos más privilexaos l'esfrute de les fachaes.

Un ascensor con una capacidá pa 8 persones xúnese a la escalera pa desaniciar les barreres arquitectóniques nes sos funciones de comunicación con tolos pisos y asina facelos accesibles a cualquier persona, y n'especial a aquelles que tuvieren dalguna deficiencia física o síquica.

Los desniveles del terrén, y la fácil accesibilidá y evacuación que demanden dellos espacios funcionales, poles sos característiques especiales d'ocupación, obligaron a asitiar el salón d'actos y la aala d'ensayos nel pisu baxu, al fondu del solar y contra'l terrén, pa consiguir de forma casi natural la esixencia d'escurecimientu que reclamen munches de les actividaes que se celebren nestos espacios. Y esti condicionante previu, terminó por convertise más nuna ventaya que nun inconveniente pa poder sacar del solar el máximu aprovechamientu arquitectónicu y urbanísticu, en siendo lliberáu de les edificaciones que lu ocupaben.

L'edificiu del centru polivalente ideóse como una construcción llibre de les propiedaes apegaes, en visu a que toles sos fachaes puean ser compuestes como principales, y cola capacidá añadida de dar lluz, vistes y ventilación a los espacios que tien. Esti planteamientu dexa que l'edificiu puea ser percorríu perimetralmente y, arriendes d'ello, tener la posibilidá, aprovechada, de que tolos pisos puedan esfrutar siquier de dos accesos (y tamién víes d'evacuación) dende l'esterior.