Pa dar respuesta a les necesidaes socioculturales, y usos bien diversos, qu'amás requieren una importante superficie pa desarrollase, proyectóse una construcción de gran volumetría de la que la so escala foi cuidada al máximu pa evitar que la so implantación provocare alteraciones escesives en La Baragaña, un llugar privilexáu de la villa marinera.

La primer estratexa arquitectónica adoptada foi separar la construcción lo más posible de les calles naquelles fachaes nes que'l so altor yera mayor. Esto pasó cola fachada sureste na que s'usa la plaza anterior a la mesma pa resolver esta transición. Na proximidá de la escalinata que da accesu urbanu a la ilesia de San Félix, l'altor del edificiu ye menor, retranqueando'l volume construíu de mayor altor p'amenorgar no posible la presión que pudiere llegar a provocar nesti espaciu tan simbólicu de Candás.

El criteriu siguíu pa consiguir la so adaptación a la cai Bernardo Alfageme foi'l mesmu: menguóse l'altor de la construcción y articulóse la so imaxe con volúmenes de distintu altor qu'allivien en bona midida la presión del edificiu sobre la cai.

La fachada noroeste tien un tratamientu especial pola escala que propón escontra los espacios urbanos periféricos. L'edificiu nesta orientación tien namás dos pisos pa integrase fácilmente coles construcciones cabo él y poder crear al empar, una fachada escontra la nueva plaza que s'antepón a la construcción pa facilitar la transición escontra la mesma, pero ensin escaecer les característiques arquitectóniques que demanda esti espaciu pa resolver con aciertu'l condicionante que supón quedar en parte a una cota inferior a la de la cai Bernardo Alfageme.

La construcción de la rampla que da accesu al tercer pisu dende esta cai encuadra l'ámbitu d'esta plaza y protéxela del esterior col enfotu de convertila nun espaciu prestosu y tranquilu pa la estancia, ensin escaecer el simbolismu que propón pa singularizar y dar calter urbanu al accesu al Centru de Mayores que s'organiza prioritariamente dende esta zona.

La imaxe que s'escoyó pal edificiu optó por una composición horizontal consiguida coles terraces y les llinies de solombra qu'éstes provoquen. L'efectu buscáu pretende amenorgar al máximu l'impactu visual del volume del edificiu, qu'adopta esta horizontalidá pa intentar "pegase lo más posible a la tierra firme".

Esta fachada sureste ufierta amás una imaxe de referencia inevitable nuna villa marinera como Candás, onde quiciabes resulta más fácil entender, "el puente de mandu qu'ufierten estes terraces al edificiu pa convertilu nun barcu amarráu a bon puertu".