La feria Empresa y Mujer  (Empresa y Muyer) ye una iniciativa municipal que surde a propuesta de la Conceyalía de Desarrollu Local y Igualdá del Conceyu de Carreño. Nació col propósitu de dinamizar la iniciativa empresarial femenina del conceyu, lo mesmo que d'otros conceyos de la redolada. Colos años foi afitándose como un instrumentu d'impulsu y ayuda al autoempléu de la muyer empresaria o entamadora. Cuenta col patrociniu del Institutu Asturianu de la Muyer.

La idea d'entamar esta feria d'empresaries y entamadores surdió nel añu 2004 nun alcuentru de trabayu  cola Asociación Empresa y Mujer, ASEM en FIDMA. Detectárase, tanto nel ámbitu asociativu femenín como nel ámbitu municipal, la necesidá d'impulsar y promocionar l'empresariáu femenín y la igualdá d'oportunidaes nel mundu de les pequeñes y medianes empreses y asina foi como dambes entidaes xunieron los sos esfuerzos pa entamar esta feria. Dos años dempués sumóse a esta iniciativa la Cámara de Comerciu de Xixón, que sigue collaborando dende entós

Esta feria Empresa y Muyer, dende los sos entamos pretendió y pretende ser un espaciu d'alcuentru ente les empresaries asturianes nel que puean espublizase y dar a conocer esperiencies relevantes y esitoses que sirvan d'exemplu y motivación a futures entamadores. Tamién tienen un importante llau formativu, yá qu'amás de la feria en sí, prográmense añalmente un refileru de xornaes formatives, con temátiques d'interés pa les participantes (nueves tecnoloxíes, prevención de riesgos, mediu ambiente, escaparatismu, paquetería, etc.) que-yos faciliten el reciclaxe profesional y tar al día en cuestiones bien necesaries nun mercáu tan cambiante como nel que vivimos.

Nun esiste requisitu en cuantes a sectores comerciales, namás con tener un negociu con polo menos una participación na empresa del 50% de la titularidá d'esta..

La participación de les empresaries, añu tres añu, foi espoxigando hasta algamar les 35 na VI edición. Por norma xeneral, participen un númberu bien altu de muyeres empresaries de la Mancomunidá d'El Cabu Peñes (Carreño y Gozón) siendo les empresaries del nuestru conceyu, les que más representación fueron adquiriendo col pasu de los años. Rescampla tamién la participación bien activa de les empresaries asociaes a ASEM. La procedencia de les empresaries foriates, cambia cada añu, anque siempre hai empresaries que son habituales nella y que vienen de Villaviciosa, La Pola L.lena, Xixón, Uviéu, etc.

En cuantes a los sectores que puen atopase les persones que visiten el recintu ferial, son dellos, yá que van dende'l testil y los complementos, hasta los servicios profesionales a empreses, pasando peles antigüedaes, la cosmética, la decoración y un cientu de variedaes.

La feria desarróllase con periodicidá añal nel muenye de Candás, nuna carpa grande o jaimas habilitaes pa fin talu. Les feches nes que se celebra suel ser pal últimu fin de selmana d'agostu de cada añu, fecha que más demanden, hasta'l momentu, les empresaries participantes. Cada edición dura tres díes, el primeru de los cuálos, el vienres, inaugúrase oficialmente con un percorríu institucional con autoridaes locales y rexonales que visiten, unu a unu, los puestos del recintu ferial.

Prográmense actividaes paraleles col fin d'atraer vecería al recintu ferial, por exemplu, habilítase una zona de chigre, un puntu d'información turística, y cerquina de la feria, habilítense espacios de ludoteca y animación infantil mientres les hores d'apertura de la feria, con cuenta de que les empresaries y persones qu'alleguen a visitamos puean dexar a lo más pequeño nelles mientres trabayen y/o merquen..

Les xornaes formatives empezaron faciéndose xunto cola feria, pero decidimos dixebrales porque d'otra miente, les muyeres espositores teníenlo bien complicao pa disponer de tiempu pa la so formación al tener que tar nel puestu. Y asina planteóse organizales mensualmente, antes de la celebración de la feria, dende les 20 hores. Desarróllense nel salón d'actos del centru polivalente La Baragaña, de Candás. Son sesiones formatives a la carta, trabayamos previa demanda del colectivu d'empresaries o entamadores que soliciten formase en talu o cuálu aspectu.