Xornaes de Coeducación - ayto-carreno
D'igual a igual
Les xornaes de coeducación De igual a igual (D'igual a igual) van destinaes a la población escolar del conceyu, trabayando con tolos niveles d'enseñanza.
La primer edición de les xornaes celebróse nel añu 2003 promovida pola Conceyalía d'Igualdá y dende entós tán faciéndose con una periodicidá añal, y na so programación/execución trabayen de manera coordinada la informadora xuvenil de la Oficina d'Información a la Mocedá de la Mancomunidá d'El Cabu Peñes y les axentes d'igualdá de la Casa Alcuentros. Tamién collaboren los AMPAS de los centros educativos y el personal docente de los mesmos, y no que se refier a la realización d'actividaes, cuéntase con entidaes, tales como, l'Asociación Xuvenil El Glayu, l'Asociación Asturiana pa la Educación Sexual o l'Asociación de Muyeres Xóvenes d'Asturies. Pal so desarrollu cuenten col patrociniu del Institutu Asturianu de la Muyer y el Conceyu de Carreño.
L'oxetivu d'estes xornaes ye educar nel fomentu de la igualdá ente sexos y la intolerancia cola violencia machista, sensibilizando y promoviendo un cambiu d'actitúes ente l'alumnáu y la población en xeneral, a favor d'una sociedá más igualitaria ente muyeres y homes.
La Constitución española, nel so artículu 14, reconoz el derechu a la igualdá y la non discriminación por razón de sexu. Dende l'Estáu, les comunidaes autónomes y les entidaes locales, tán desarrollándose polítiques de fomentu de la igualdá ente muyeres y homes, y una de les midíes que se tán executando ye la coeducación.
¿Qué entendemos por coeducar?
- Educar a los neños y neñes dende la infancia nel respetu ente homes y muyeres.
- Educar pa que los neños y les neñes se sientan bien siendo lo que quieren ser, ensin presiones sociales por razón de sexu.
- Utilizar un llinguaxe que represente dambos sexos, un llinguaxe non sexista.
- Ampliar les oportunidaes educatives y formatives, evitando segregaciones por razón de sexu.
- Compartir ente homes y muyeres dende lo que somos, dende la nuestra historia, dende lo qu'aportamos al conxuntu de la humanidá.
- Dar el mesmu valor al fechu de ser home o al fechu de ser muyer.
- Educar a homes y muyeres completos apurriéndo-yos conocimientos que los ayuden a entender esti mundu, dándo-yos la oportunidá de conocer y trabayar sobre les sos emociones y sentimientos, estimulándolos a tener en cuenta qué precisen y que son necesarios pa les persones coles que conviven.
PROGRAMACIÓN
Cada añu, na segunda quincena del mes de marzu, nel marcu de les xornaes de coeducación D'igual a igual prográmense una serie de talleres adaptaos específicamente a los niveles de les edaes del alumnáu col que se va trabayar. Ente delles actividaes que se vienen desenvolviendo nos postreros años, rescamplamos les siguientes:
Institutu d'Educación Secundaria de Candás
Talleres educativos con perspectiva de xéneru basaos en les revistes xuveniles Somos de revista; talleres de prevención de trestornos alimentarios; de prevención de violencia de xéneru; talleres y charres d'educación afectivo-sexual Aprendiendo a entendernos; l'anticoncepción y las opciones; las sexualidades adolescentes y sus diversidades; talleres que combaten colos estereotipos sexistes preesistentes No trivialices o talleres d'intelixencia emocional ente otros
Escueles San Félix y Poeta Antón:
Ludoteques non sexistes pal alumnáu d'Educación Infantil, talleres de rellaciones personales y habilidaes sociales con dinámiques, xuegos, exercicios y reflexones qu'analicen la identidá de neños y neñes na vida cotidiana Taller de ligones/as representaciones teatrales pa enseñar a neños y neñes cuestiones básiques sobre xéneru Ciencia exacta, talleres con actividaes deportives que fomente esta práctica n'igualdá (aeróbic, fútbol)
Escuela de 0-3 años y las aulas maternales:
Cuentos, xuegos y charres-coloquiu colos padres, madres, güeles y educadores sobre cómo contar cuentos con perspectiva de xéneru.