Crimson

"On the road again", una frase que resume la sensación que mos inundó va unos meses al volver tocar en directo tres un pequeñu parón que se mos fizo eternu. Volvimos anque en realidá enxamás coláremos, polo menos n'espíritu. Y como tol mundu sabe, na música, l'espíritu ye daqué malo de definir pero qu'inflúi más que nenguna otra cosa nel resultáu final, na manera en que componemos les canciones, en cómo les interpretamos y en cómo encaramos el retu de volver xubir a un escenariu, agora con más esperiencia y con enerxía anovada.

Esi espíritu que fluía peles nuestres venes llevómos a empecipiar esti nuevu proyectu allá pela primavera del 2013. David García (voz), Jesús Amez (batería), Pablo Rodríguez (baxu) y Mario Novo (guitarra) somos los componentes de Crimson; caún con una esperiencia musical a los sos llombos, caún del so pá y de la so ma y agora poniendo en común tolo aprendío.
Ente les nuestres influencies hai que destacar a grupos del rock británicu de los años sesenta y setenta como Led Zeppellin, Rolling Stones, The Who o Fleetwood Mac, según los grandes solistes y grupos estadounidenses, Bob Dylan, Neil Young, The Band, The Black Crowes... Tamién habría que citar dellos grupos más actuales, especialmente los rellacionaos cola música sicodélica, nomes como Tame Impala o The Blue Angel Lounge.

Poco más que dicir, namás qu'entamemos un nuevu viaxe y qu'esperamos atopavos pel camín.

Contactu:

Teléfonos:

    Mario: 646 85 04 06

Corréu electrónicu: crimsonrock@outlook.com
Páxina web: www.crimsonrock.es

Skama La Rede

Esta banda proveniente de los conceyos de Gozón y Carreño foi creada va cuatro años y xunióse al incipiente movimientu de rock n'asturianu. El nome foi coyíu d'una espresión de los marineros d'estos conceyos, que llamen "escamar la rede" cuando a daquién se-yos arrampla lo que teníen pescao. El so estilu ta claramente influíu pol Ska, música d'orixe xamaicanu, pero qu'ellos interpreten a la manera en que se dio a conocer masivamente nos años setenta n'Inglaterra (Madness, Specials, Selecter...). Sobre esa base skatalítica creen les sos composiciones con plizques de punk, rock, reggae y folk.

Lo suyo ye una propuesta empobinada fundamentalmente al baille y la diversión, compuesta por un ritmu pegadizu y unes melodíes que, al traviés de la gaita y la trompeta, llamen a la fiesta. Col so primer discu La nuesa hestoria diéronse a conocer al gran públicu y multiplicaron los conciertos. El so trabayu llevólos a ser la formación que más rescampla ente los grupos nuevos de rock en llingua asturiana.

Nel so segundu álbum afonden más na so propuesta, perfeccionándola. Rescampla especialmente la contundencia del soníu y el nivel alcanzáu nos sos cantares. El so segundu CD ta compuestu de doce cortes, onde amuesen una evolución tanto musical como lliteraria. Testos, irónicos o reflexivos, amuesen les sos esmoliciones sociales cola descripción de situaciones y socesos de la realidá asturiana y mundial.

Skama La Rede ye un grupu que conecta perbién cola mocedá y tien capacidá pa facer llegar la música n'asturianu ellí onde nun lleguen otres propuestes.
El grupu ta compuestu por Miguel (voz), Edu (guitarra), Xuárez (baxu), Llou (batería), Kike (gaita), Sergio (teclaos) y Fer (trompeta).