El grupu Gabiana formóse nel añu 1985 a iniciativa d'un puñáu d'amigos, integrantes y fundadores, en bona parte, de la Escolanía del Cristo de Candás.

Gabiana nació col enfotu de conmemorar los 20 años de la fundación de la escolanía, formación que data del añu 1965, y dende un principiu caltuvo una composición d'ente 15 y 20 persones.

So la dirección de Pipo Prendes interpretaron les composiciones relixoses d'ésti en dellos actos relixosos de Carreño y el restu d'Asturies.

Nel añu 1992 grabaron el so primer discu Una cosecha buena con cantares de Pipo Prendes, temes tradicionales llatinoamericanos y habaneres. Unos años más tarde tamién intervieno en bona parte de los temes grabaos nun discu editáu pol Conceyu de Carreño con cantares populares del conceyu.

Esti coru quixo collaborar siempre, dende les sos canciones, a proyectar  la imaxe de Candás y Carreño, siendo un brazu más de los grupos candasinos, sobremanera a la de rescamplar la música de la mar.

Tamién hai que destacar que Gabiana siempre tuvo enfotáu nel compromisu col conceyu por participar n'actos nos que, dende la música, punxo'l so granu d'arena.
Anguaño, Gabiana, ta preparando un enfoque nuevu pa les sos próximes actividaes que pasen por tar al llau de les persones que más lo precisen, cola esperanza de que la so música sía un vehículu estupendu pa ello.

Contactu