El Grupu Cultural Xana, entama les sos actividaes pa finales del añu 1980 al traviés d'un grupu de persones con esmolición cultural, representando la obra Xuicu de faltes orixinal d'Antón de la Braña. Dende entós, esta actividá vien desarrollándose de contino, con obres toes elles asturianes, representaes dientro y fora del Principáu, participando en certámenes, salones, xornaes, etc, en cases de cultura de Castropol, Pravia, Piedras Blancas, Lluanco, Granda (Xixón), Morea (Ayer), Turón. Teatros: Teatro Prendes de Candás, Palacio Valdés d'Avilés, Campoamor y Filarmónica d'Uviéu, Xovellanos de Xixón. En Barcia, La Roda, Taramundi, La Pola (L.lena), Torazu, Morcín, Lleón, Benidorm, etc.

Nel 1984 llogra'l galardón: la Concha de Plata al Teatru Ástur. Tamién hai que destacar la participación nel IV Selmana Cultural d'Asturies en Suiza, nel añu 1992, con representaciones en Xinebra, Berna, Basilea y Aarau.

Venticuatro son les obres que componen el repertoriu, que van dende los 20 minutos hasta cerca de dos hores de duración, siendo estes postreres: El gallu la quintana, Los amores de ximielga, Mariposita, El alma de José, El fantasma de Cabrales, toes elles d'Eladio Verde; La herencia de Telva, de Pepe Casín; Después de vieyos...¡Gaiteros!, Colasa maquiavélica, Los homes en carnes, obres d'Eloy Fenández Caravera y La barca sin pescador de A. Casona.

Nel añu 1981 constitúyese como agrupación cultural pa poder ampliar les actividaes.

Asina, a principios de 1982 fórmase'l Grupu de Baille Tradicional con componentes de toles edaes y col principal oxetivu d'esparder el folclor tradicional al traviés de la enseñanza a los sos componentes, de les grabaciones sonores que dende 1995 vien editando na serie Cantos y bailles d'Asturies qu'anguaño cuenta con 7 volúmenes en formatu CD y CS:

• El son nel romanceru tradicional (I) y (II)
• El son nos bailes corrios (I) y (II)
• El son nos cantares de la revolución d´ochobre del 34
• El son nes dances de rueda del calter festivu profanu (I) y (II)

Y de las distintas muestras y actuaciones a nivel local, nacional e internacional, merecen rescamplar:

• Festival Internacional de los Pirineos en Jaca
• Festival Mundial de Montrejeau
• The Internacional Aboriginal Culture&Art Festival de Taiwan
• Stichting Folkloristisch Festival Sainad en Raalte
• Muestra Internacional n'Israel
• Festival Interceltique de Lorient
• Muestra Internacional de Cultura en Coahuila (México)

En 1982 forma una agrupación de cuerda (Rondalla) compuesta por 36 persones, con instrumentos de cuerda (guitarres, laudes, bandurries).

En 1992 empecípiase la escuela de gaites (gaita y tambor), complementu perfectu pal estudiu del folclor integral (música, danza, baille).

Entama distintos actos culturales p'amosar la cultura asturiana como: la Foguera de San Xuan, en Perlora, con representación del Enrame la Fonte, apaición de la Xana, dances tradicionales. El Ramu de San Antón en Perlora, con ufrienda de ramu engalanáu onde les moces entonen cantares a San Antón y d'ufrienda. Tamién s'empecipió  la ofrenda del ramu a la Virxe de los Remedios patrona de Carreño.

Nun podemos escaecer tampoco les muestres culturales y de folclor de Carreño, prueba d'intercambios culturales, realizando muestres nel Teatro Prendes y na plaza de la Baragaña y mesmamente un desfile dende Perlora a Candás (1991 a 1996 dambos inclusive).Tamién participen nel Salón de Teatru Costumista en collaboración col Teatro Prendes de Candás, en talleres d'aniciu al teatru pa neños/es y mocedá, en xornaes gastronómiques, siempre con ambiente asturianu y de xacíu, na fiesta de San Salvador con homenaxe a los neños y neñes y a les persones mayores.

Nel añu 2001, recibe l'Urogallu de Bronce 2000 concedíu pol Centru Asturianu de Madrid, y el VIII Premiu Distinción (premiu d'ámbitu nacional) concedíu por San Félix de Valdesoto.

Contactu