Coros Parroquiales - ayto-carreno
Coros parroquiales
Coro parroquial de Quimarán/Guimarán
Nos sos empiezos nun teníen instrumentos qu'acompañaren y dieren tonu a les sos voces; posteriormente, incluyóse l'órganu y más tarde les guitarres. Ente les actuaciones que fai a lo llargo del añu, podemos mentar les comuniones, bautizos y fiestes sacramentales de los pueblos que llenden la parroquia (Ambás, Tamón, Llorgozana, Prevera, etc) y mesmamente bodes que se celebren n'otres parroquies de la provincia.
Nel iviernu, estación na que les actuaciones fuera del nuestru conceyu son menos frecuentes, acompañen les mises de domingu de Quimarán/Guimarán.
Hai que facer mención especial a una de les sos actuaciones más importantes del añu, como ye la misa n'honor a la patrona del conceyu de Carreño, nuestra Señora de los Remedios en Quimarán/Guimarán, que se celebra a mediaos de setiembre. A esta festividá alleguen centenares de romeros de tolos conceyos de la provincia d'Asturies y nella el coru parroquial ufierta l'himnu a la so patrona. D'un tiempu p'acá, el númberu d'integrantes viose amenorgáu, por motivos personales de los mesmos, hasta quedase compuestu na actualidá por una decena de voces d'edaes bien variaes.
Contactar
Teléfonos:
- Andrea: 678 23 02 28
- Amaya: 620 46 92 96
Coro parroquial de Perlora
Dirixía aquel coru Mª Luisa Zanón, que yera amás maestra de Perlora.
Nos años darréu anteriores a la Guerra Civil el coru taba formáu namás por voces femenines.
Tres el paréntesis de la Guerra Civil y la década de los cuarenta, el coru renaz nos años cincuenta, dirixíu por José Arrinda que, a pesar de nun tener estudios musicales, tocaba l'órganu que'l mesmu construyere.
Na década de los sesenta, ye Mª Luisa Zanón, otra vuelta, la que dirixe al coru, hasta la so desapaición, asocedida primero que rematara la década.
Estos coros de los años cincuenta y sesenta, al igual que los anteriores, siguíen tando integraos namás por voces femenines.
Nel branu de 1998, Merche García Junquera, decide animar a delles amigues y amigos p'alicar la tradición del coru Parroquial de Perlora y recuperar los cantares y especialmente los villancicos que recordaba oyer interpretar na so adolescencia al coru empobináu por Mª Luisa Zanón.
La so idea tuvo una entusiasta acoyida, y contactaron con Blanca Vigón (organista y profesora de música) pa que fuere la so directora.
En cuantes que Blanca Vigón aceptó la proposición, tolo demás foi bien fácil: n'ochobre de 1998 empezaron a ensayar (sobre manera villancicos) y foi na misa de Navidá de 1998, cuando na ilesia de Perlora se volvió escuchar al coru parroquial, magar esti renacíu coru, a diferencia de los anteriores mentaos, taba formáu por voces femenines y masculines.
Animaos pola bona acoyida que tuvo la iniciativa, tanto per parte del Señor Párrocu, Don Jesús, como per parte de los y les feligreses, ampliaron el so repertoriu pa cantar tamién nes mises de los díes más señalaos del calendariu llitúrxicu y nes fiestes de la parroquia: San Antonio, Selmana Santa, Les Primeres Comuniones, La Fiesta Sacramental, El Salvador y La Virxe de La Victoria.
Dieron depués un pasu más y amás de cantar nes mises de les fiestes de les parroquies qu'atiende Don Jesús (Priendes, Prevera, Albandi, Carrió) suelen cantar en munchos de los funerales que s¿oficien en Perlora y tamién en dalguna boda o bautizu, sobre manera naquellos que tienen rellación colos integrantes del coru o colos sos familiares.
Va trés años, incorporóse a esta formación Amaranto Menéndez del Valle que collabora con Blanca Vigón na dirección del coru.
Dao que la mayoría de les persones que lu integren carecen de formación musical, el llabor de Blanca y Amaranto ye bien meritoriu.
Nel apartáu de premios, hai que mentar que nel añu 2007, Los Serondos de Perlora consideraron qu'esti coru yera merecedor de la Faba d'Oru qu'añalmente dan a aquelles persones o entidaes que rescamplen pol so llabor en pro de la parroquia.