• Datos de contactu

L'IES de Candás ye un centru qu'acueye al alumnáu d'Educación Secundaria Obligatoria (ESO) y de Bachilleratu del conceyu de Carreño..

La so población escolar arrodia los 360 alumnos/es y cuenta con una plantiya de 50 profesores.

Nel mesmu danse los cuatro cursos de la Educación Secundaria Obligatoria y el Bachilleratu de Ciencies Sociales, Humanidaes y el de Ciencies de la Naturaleza y Salú. Tamién, y dientro de les midíes d'atención a la diversidá, dispón de programes de diversificación de 1 y 2 años, un aula de pedagoxía terapéutica y un aula pa inmigrantes. 

Dientro de la so ufierta educativa cuenta con una sección billingüe d'inglés que nesti momentu tien tres grupos en 1^u, 2^u y 3^u de la ESO. El so oxetivu ye la meyora de la capacitación llingüística y socio-cultural del escolináu qu'estudia esti idioma col aumentu de les hores dedicaes a la enseñanza d'esta asignatura y l'enseñu parcial d'una o dos materies n'inglés. 

Los proyectos d'anovación pedagóxica que tien el centru son:

• Integración de les nueves tecnoloxíes. Tien como oxetivu l'afitamientu de les NNTT nel aula y algamar que l'alumnáu sía a facer un usu razonáu de les posibilidaes qu'ufierten les mesmes.

• Biblioteca. Nesti proyectu desarróllase una campaña d'animación a la llectura qu'arrodia delles actividaes encaminaes a fomentar l'hábitu y la formación llectora del alumnáu: concursos de rellatos y llectura, club de llectores, recomendaciones de llibros, alcordanza de feches y eventos, esposiciones temátiques, foros de participación na web del centru etc.

• Educación vial. Con esti proyectu intentamos acercar l'alumnáu a una realidá de bon agüeru en cuantes a la prevención y posterior reducción d'accidentes viales.

• Conserveres. Anguaño trabayamos na  meyora de la rodiada del centru y l'aprovechamientu de los espacios naturales que lu arrodien con fines docentes yá que nun taben aprovechaos enforma pol so mal estáu y configuración.

Les instalaciones del centru cuenten con biblioteca, aula modelu y de nueves tecnoloxías, llaboratorios, talleres, aula de música, aula d'educación plástica, taller d'artesanía, ximnasiu, pistes polideportives, cafetería, etc.

L'horariu llectivu ye de 8:40 a 14:35 hores. La sección billingüe tamién tien clases el llunes y martes ente les 15:30 y 17:20 hores.

Más información: páxina web del institutu.