Antonio Rodríguez García, "Antón", nació en Candás el 16 de febreru del 1911  nuna familia humilde. Yá de neñu amuesa una impresionante disposición y maña pa tolo que tien que ver col dibuxu y les manualidaes. Trabaya como mozu  los recaos pal casinu de Candás.
Nel 1924, terminaos los estudios primarios, ayuda a so pá nos llabores d'albañilería. D'esti periodu de neñu y adolescencia consérvense dellos dibuxos, pintures, relieves y escultures. Cola interseición del pintor Evaristo Valle algama sofitu económicu del industrial conserveru Alfonso Albo, lo que-y permite treslladase a Madrid, onde fincó nel 1931.

Nel 1933 asitia'l so propiu estudiu xunto al pintor uruguayu Alejandro Metallo. Enamoráu de la so tierra y sobre manera de la so villa natal, alterna les sos estancies na capital con otres n'Asturies. Nel branu del 1936 sorprénde-y la guerra civil en Candás, onde ye deteníu y encarceláu na ilesia parroquial, salvando de la destrucción el so valiosu retablu churriguerescu.

Darréu d'ello, treslládase a Murias (Candamu), zarrándolu nun campu  trabayu. Víctima inocente de los horrores de la guerra muerre na primavera de 1937. Nel so curtiu camín artísticu puen señalase dos periodos:.

• El primeru entama nel 1928, cuando Antón constrúi'l so estudiu particular, una construcción de madera na güerta de la casa familiar. Esta  correspuende a una etapa de formación autodidacta, na que trabaya guiándose sobre manera pol so innegable instintu escultóricu y la so innata sensibilidá artística.
•  El segundu, que conclúi cola so muerte -a los 26 años d'edá-, ye una fase mui abierta a les influencies esternes directes, como correspuende a la formación y a la información que va completando y algamando.

Dende'l puntu de vista de la técnica pue afirmase qu'Antón ye un escultor d'oficiu, que domina a la perfección numberoses técniques, dende la talla al modeláu, un apreciable pintor y un notable dibuxante. Estilísticamente pue señalase una constante nel so facer como ye la espresión del más fondu esmolecimientu por espeyar la realidá social, la idiosincrasia, les costumes y los tipos del so pueblu asturianu.

La muestra permanente d'Antón axunta una selección de pieces escultóriques feches ente 1928 y 1936 y algama casi la totalidá de los temes, les técniques. Xunto a pieces emblemátiques y espresionistes dafechu como "Mi Güela" o "La Señá Isabel", o iróniques y  que pescuden la peculiaridá asturiana como "Rapacina", "Fin de la romería" o "Antroxu", el visitante pue alcontrar obres enllenes de gracia, delicadeza y intimidá, como los retratos de "Oscarín" y "Maruja", xunto a otros tan firmes y tan bien resueltos técnicamente como "Alfonso Albo" y "Evaristo Valle".