L'entamu de la Edá Contemporánea ye visiegu nel conceyu de Carreño como nel restu d'España y vien marcáu pola Invasión Francesa y la Guerra d' Independencia.

El 28 de mayu de 1808 el Conceyu declára-y la guerra a Francia y constitúi un batallón de voluntarios que van formar el Reximientu d'Infantería de Candás y Lluanco, participante n'abondoses batalles per ende n'España. Una d'eses batalles, la del Puente de San Sebastián d'Avilés, diba acabar en derrota lo qu'acarriaba la perda de toa esa zona y que la población cadeciere espolios y padecimientos hasta'l final de la invasión; pero ésti nun foi'l puntu final yá que la villa y el conceyu sufrieron la invasión del exércitu francés en tres ocasiones.

El segundu fechu d'importancia asocedíu nel s. XIX foi que'l conceyu dixebróse en tres Ayuntamientos: Candás, Quimarán y Tamón. La esperiencia duró namái dos años y en 1823 Carreño recuperó'l so ámbitu territorial históricu.

Nun podemos escaecer los terribles naufraxos sufríos por marineros candasinos nel sieglu XIX: 24 de xineru de 1840: 96 pescadores; 14 de xineru de 1877: 30 pescadores; 21 d'avientu de 1891: 11 desapaecíos na mar.