L'escudu d'armes del Conceyu de Carreño ye de forma rectangular, allargada la punta na so base. Los sos blasones: en campu verde águila real coronada; tendíes les ales pintaes de negro, verde y encarnao; posando les garres enriba dos ruedes de carru, d'oru, con ocho rayos encarnaos caúna  y nel exe, dos flores de lis (lliriu) doraes. Tien bordura encarnada na qu'apaecen ocho aspes d'oru y por divisa Mui lleal y fiel.

El rei de Castiella y Lleón, Alfonso XI El Xusticieru, dio-y el dictáu de lleal por tener lluchao los de Carreño baxo la bandera de Xixón na célebre batalla de El Salado, añu 1340. La concesión honorífica asocedió diez años más tarde, en 1350.

El títulu de fiel algamólu y recibiólu de manes de Felipe V (primer rei de los Borbones) en premiu a la fidelidá a la so persona y causa na Campaña de Cataluña (Guerra de Sucesión) pal añu 1717.

Les ocho aspes: a don Álvaro de Carreño, ún de los principales caballeros soldaos que con don Lope de Haro llucharon al llau de don Fernando III, El Santu na conquista de Baeza y victoria d'Úbeda'l día de S. Andrés del 1237, "dio-y el rei les ocho aspes d'oru qu'orlen los sos escudos d'armes y les del conceyu del so nome".

L'escudu tomóse de los blasones de la familia del so mesmu nome, de nobleza y solar perconocíos por llevar vivío los sos antecesores dende cuantayá na parroquia de Santa María la Real de Llorgozana. Rexidores en sieglos de los destinos del conceyu, como xueces del Estáu noble, rexidores alféreces mayores y "demás oficios de república"; bien fueren los Carreño Alas, los Moñices Carreño de Quimarán/Guimarán - El Valle o Carreño Miranda y Busto Carreño de Llorgozana; Moñices Carreño del Cueto, de la villa y muenye de Candás; los Carreño d'Uviéu (depués Gastañaga), alféreces mayores de la ciudá o los de Bernardo de Quirós Carreño de Carrió, marqueses de Campo Sagrado dende'l sieglu XVII y otros munchos.

Oríxenes del escudu heráldicu

Nel llibru manuscritu de Tirso d'Avilés Orígenes y antigüedad de las principales Casas Solares de Armas Pintar, escritu nel XVI y esistente na Real Academia de la Historia (Madrid) y publicáu nel 1956 col títulu de Armas y linajes de Asturias y antigüedades del Principado, amuésase lo siguiente: "esti solar ye mui antiguu nel conceyu de Carreño y asina tolos que descienden de dichos solares tiénense por buenos fidalgos. Pinten por armes águila negra en campu blancu con siete aspes del Santu Andrés amarielles en campu verde por orla d'esti apellíu que tenía d'haber homes principales... " El blasón ye'l que vien darréu:

En alto campo pintado
yo vi un águila real
toda negra y principal,
y por siete aspas cercada
amarillas sin igual.

Los Monizes de Carreño
estas armas son nombradas
por ellos mui bien ganadas
en batallas que no cuento
que fueron bien afamadas.

Na executoria de los marqueses de Campo Sagrado, ta recoyío que los señores "de Carreño" n'Asturies traíen en campu de plata dos ruedes de carru con ocho rayos caúna y enriba d'elles les pates d'una águila coronada; figurando al llau de dambes - ente les ruedes y les ales - una flor de lis y otra enriba la cabeza y "teniendo por orla una raya de gules (encarnao heráldico/llinies verticales bien espeses) en campu de plata y ocho aspes d'oru". .

Los escudos nobiliarios de les "casones" de Santa María de Llorgozana y S. Llorienzu de Carrió (recibíos de la vieya familia "Carreño" y coles mesmes apareyaes) tienen como motivu central y blasón común l'águila coronada, les ruedes de carru y, en casi toes, les flores de lis y les aspes de S. Andrés. Tamién puen vese nos palacios de la familia Campo Sagrado d'Avilés (escudu de los "Alas" - Carreño) asitiáu na fachada posterior que da pal parque de la mentada villa, asina como nel de Muñiz del Cueto, de Candás y mesmamente nos que tán n'otres provincies como'l del palaciu de los Marqueses de Villasinde y de la Casa d'Omaña na ciudá de Lleón. Y mesmamente nos munchos solares fundaos tanto en Carriedo (Santander) como en Sevilla, Murcia y hasta nes Amériques, onde s'espardió la nobleza del nomáu llinaxe de "los Carreño".

Mención especial merez el de Carrión de los Condes (Palencia) qu'amuesa ente dos carros y otros tantos castiellos delles ruedes de carru. Dizse que los blasones  tomólos la ciudá d'un Don Alonso de Carreño, fundador y proxenitor del llinaxe Carrión, al asitiase nella cuando cola so activa participación foi tomada a los moros nos primeros tiempos de la Reconquista, época del Rei Alfonso II "El Casto". "L'escudu heráldicu de "los Carrión" ye'l mesmu  que tienen "los Carreño" qu'echaron los sos raigaños nel valle de Carriedo (Santander) y que yeren orixinarios d'Asturies".

Acordies lo dicho, l'Escudu Heráldicu del conceyu de Carreño ye l¿amestanza estructural, ordenada correchamente, de les diverses armes de los nobles "Carreño" xuníes a les families de más llinaxe de la Provincia y munches fuera d'ella. Probó la so nobleza nes Órdenes de Santiago (1670, 1687 y 1688); Calatrava (1745) y Alcántara (1663); na Real Audiencia d'Uviéu (1758, 1759, 1773, 1787 y 1831) y mesmamente na Real Compañía de Guardies Marines, en 1753.

Autorización pal usu del escudu

Hasta pasada la metá del S. XIX nun tuvo'l Conceyu timbre reconocío magar les continues reclamaciones de la Xusticia y Reximientu porque acordies ta recoyío nun documentu del 1662 "los tratadistes de ciencia heroica nun concedíen al Conceyu de Carreño la honra de pintar armes". Poro, pal sellao de documentos y otres necesidaes del Conceyu, usaben l'emblema d'Asturies  pa  que "os Conceyos a los que los tratadistes d'heráldica o blasón nun dean escudu oficial d'armes puen usar, y asina lo tán executando nos timbres de les sos comunicaciones y demás asuntos oficiales, l'escudu de la Provincia.

Asina siguió hasta que nun nuevu requerimientu del Conceyu, "el Gobernador Civil de la Provincia, por oficiu del día dos de xunetu del 1866, dio'l preste al Conceyu pa usar el so escudu privativu" que ye'l d'anguaño.

Per un escritu de 14 d'avientu del 1684, sabemos que nes cases conceyu de Candás, dende la so institución nel 1630, asitiábense escudos de los monarques que reinaben daquella. Nun contratu concedíu énte l'escribanu públicu de la villa y conceyu, testigos y fiadores, Xusticia y Reximientu, comprométese a pagar 140 reales de vellón por quitar dos escudos antiguos del edificiu municipal y dexar otru de les armes reales, teniendo de poner los suprimíos colos que tán na plaza pública d'esta dicha villa..

Bandera

En dellos escritos de sieglos pasaos  mencionábense les banderes y pendones del Conceyu que yeren llevaos n'ocasiones solemnes pol alférez mayor, ensin qu'hasta'l momentu pudiéremos saber la so descripción. 

La única conocida, azul cola Cruz de la Victoria n'oru, foi  desfecha dientro  la ilesia parroquial de Candás onde taba depositada, pal branu de 1936. Esta perteneciere al gloriosu reximientu de cazadores de montaña "Candás y Lluanco" creáu en xunetu de 1808 pa combatir  les tropes invasores franceses del emperador Napoléon Bonaparte.

Histórica enseña qu'en delles ocasiones solemnes sacábase del templu y  llevábase en procesión a la Casa Conceyu y asitiábase nel balcón central onde presidía los actos, asina como la xura de la Constitución de 1837 por tol pueblu aconceyáu na plaza'l 9 de xunetu del mesmu añu.

Marino Busto nel so llibru Historia del Concejo de Carreño en la general de Asturias indicaba en rellación a dicha bandera qu'él mesmu tuviere nel Muséu del Exércitu y comprobare la esistencia d'una bandera de color blanco cola imaxe del Santísimo Cristo de Candás.

Señalaba tamién na mentada publicación, que pudo contemplar un grupu de banderes no cimero d'un cuartu llamáu "de la reina". Diches banderes pertenecieron nel XVII a los Tercios de Nápoles y ente elles alcontrábase la bandera que se sacaba del templu a la Casa Conceyu ensin que fuere quien a identificala.

Posteriormente, per carta del subdirector xeneral del muséu de fecha 9 de febreru 1979, confirmóse la esistencia de tala bandera ensin que Busto pudiere describila pol so estropiciu..