Nos sieglos posteriores la villa de Candás va siguir cola so especialización pesquera y les rellaciones comerciales marítimes xorrecen. La pesca de la ballena ocupa  a bona parte de los marineros candasinos y nuna de les munches incursiones na mar d'Irlanda tien llugar l'alcuentru del famosu Cristu de Candás.

Del esporpolle de la villa fálennos la contratación nesta época (s. XVII) d'un maestru d'instrucción pa neños y d'un ciruxanu, asina como l'ampliación del templu parroquial y la construcción de la Casa Conceyu.

Tres años d'engarradielles Carreño independízase d'Avilés y constitúise en conceyu autónomu pa finales del sieglu XVI. Daquella les Xuntes de Conceyu celebrábense alternativamente un añu en Quimarán y otru en Candás, anque la primer capital del conceyu tuvo en Sebades (Llorgozana).

Una anécdota curiosa ocurrida nel 1624 ye l'ablucante "Pleitu de les Tolines"  qu'enfrentó a pescadores candasinos colos simpáticos cetáceos. Aquéllos, fartucos de qu'éstos esgonciaren los sos preseos de pesca, decidieron entamar un pleitu escontra d'ellos. Finalmente sentenciaron a les tolines a abandonar les costes candasines y éstes acataron la decisión y colaron d'estes tierres. Un monumentu, obra del escultor Santarúa, conmemora esti sorprendente acaecimientu.

Nel sieglu XVIII sigue'l remocicamientu y reconstrucción del puertu, el de mayor tráficu de la costa asturiana y el que facilitaba'l preciu de la pesca al restu los puertos de La Mar Cantábrica; amás hai una gran actividá portuaria d'astilleros pa la construcción y reparación de barcos. Nesti sieglu fúndense les cofradíes de pescadores de Nuestra Señora del Carmen y Ánimas del Purgatorio. Fáense nuevos arreglos en puertu y asítiense los cañones na talaya de San Antonio pa la defensa de la villa. Ye entós cuando toles funciones alministratives se centralicen nes Cases Conceyu de Candás.