El sieglu XX supón un cambiu positivu nel conceyu que traviesa una primer estaya industrializadora: bodegues de salazones, fábriques d'escabeche, siete fábriques de conserva, minería del fierro, fábrica de productos químicos d'Aboño, inauguración de la llinia de ferrocarril hasta El Musel...

La evolución social y cultural ta apareyada a la económica y espéyase na estensión y xorrecimientu de la enseñanza per tol conceyu y nun tempranu movimientu asociativu (Asociación d'Agricultores de Carreño, Atenéu Obreru...) y político-sindical.

Na Guerra Civil Carreño nun tuvo un papel protagonista, anque n'El Valle rescampla la construcción del campu d'aviación más importante de la fastera republicana y que tuvo activu hasta ochobre de 1937 cuando tol conceyu pasó a manes de los nacionales.

En pasando la guerra diba siguir el procesu industrializador de la comarca. L' asitiamientu d'Ensidesa ' Endesa - a industries auxiliares nes llendes occidentales del conceyu y la fábrica de Cementos Tudela Veguín, Uninsa y la Central Térmica d'Aboño nel marxe oriental, provoquen un espoxigue demográficu y económicu desconocíu hasta entós en Carreño y sobre manera na so capital, que voltia dafechu na so estructura urbana.

Tol sector primariu y sobre manera la pesca y industries asemeyaes van desaniciándose sele que sele nun procesu  del qu'intenta salir anguaño cola construcción del nuevu puertu.

La grave crisis industrial de los años 80 y la consecuente reconversión marquen l'amenorgamientu de la rexón y con ella'l d'esti conceyu - nun hai nueves instalaciones industriales (menos la de Du Pont) - y la economía de Carreño paez orientase hacia'l sector servicios, sector nel que'l vagar y el turismu xueguen un importante papel.