Estas en:

Prestaciones pa persones con discapacidá

Información y tramitación del reconocimientu de discapacidá

El reconocimientu del grau de discapacidá pertenez a los Centros de Valoración de Persones con Discapacidá, dependientes de la Conseyería de Bienestar Social. Pa facer la solicitú ye necesario apurrir copia de los informes médicos qu'acrediten la discapacidá alegada y fotocopia del DNI.

Más información: www.asturias.es

Información, tramitación y xestión de la tarxeta d'aparcamientu pa vehículos que tresporten persones con movilidá menguada

 Esta tarxeta dexa que los vehículos que tresporten a persones que dispongan d'ella, puean usar los aparcamientos reservaos a persones discapacitaes y si nun hubiere places disponibles, aparcar en llugares que nun impidan el pasu d'otros vehículos nin persones. Pa poder solicitar esta tarxeta ye necesario tener reconocida primeramente la condición de discapacitáu/ada, teniendo d'apurrir nel momentu de la solicitú la copia de la resolución acreditativa d'esta condición y fotocopia del DNI. L'espediente ye unviáu al Centru de Valoración de Persones con Discapacidá qu'emite l'informe correspondiente, en base al cuál el Conceyu resuelve. Si'l dictame ye favorable, emítese la tarxeta d'aparcamientu que tien de tar firmada pola persona beneficiaria y cola so fotografía.

Ayudes individuales a persones con discapacidá

Información y tramitación d'ayudes individuales pa persones discapacitaes, convocaes añalmente pola Conseyería de Bienestar Social.

Más información: www.asturias.es

Pensiones non contributives d'invalidez

Son prestaciones económiques de la Seguridá Social, tramitaes al traviés de la Conseyería de Bienestar Social nes que se reconocen a aquelles persones que nun tengan recursos abondos pal so mantenimientu nos términos llegalmente establecíos, inda cuando nun cotizaren nunca o'l tiempu de cotización nun fuere lo bastante p'algamar les prestaciones del nivel contributivu. Con calter xeneral tienen que cumplir los requisitos siguientes:

  • Tener cumplíos 18 años.
  • Tener reconocíu un grau de discapacidá igual o superior al 65 %.
  • Vivir llegalmente en territoriu nacional polo menos 10 años ente la edá de 16 años y l'edá de devengu de la pensión, de los que 2 tendrán de ser consecutivos y anteriores darréu a la solicitú de la pensión.
  • Nun tener la so unidá familiar rentes o ingresos abondos.

Más información: www.asturias.es

Agospiu alternativu

Son recursos específicos d'agospiu pa persones adultes discapacitaes con imposibilidá de vivir na casa familiar porque nun esista o por otres circunstancies inherentes a la so discapacidá. La valoración y concesión de les places pertenez a la Conseyería de Bienestar Social, previa tramitación dende'l centru de Servicios Sociales.

  • Centros residenciales: son recursos destinaos a dar agospiu a persones adultes con discapacidaes, con una situación socio-familiar que nun-yos permiten vivir nes sos cases y precisen, pol so grau de dependencia, un mayor nivel d'ayuda personal y social que facilite la so integración social. Los sos oxetivos son ofrecer agospiu permanente y facer posible una atención integral dende'l desarrollu de programes personalizaos que garanticen la integración comunal. La valoración y concesión de -yos places ye competencia de la Conseyería de Bienestar Social.
  • Pisos y viviendes tutelaes: son recursos destinaos a dar agospiu permanente a persones adultes con discapacidaes con una situación sociofamiliar que nun-yos permite vivir cola so familia o nel so llugar habitual de residencia, ufiertando un modelu de convivencia normalizáu y organizáu en núcleos convivenciales pequeños.

Más información: www.asturias.es

Centros d'apoyu a la integración

Son recursos especializaos d'atención y formación pa persones adultes con discapacidaes y de les que'l so oxetivu ye favorecer tanto la integración sociollaboral como la promoción del desarrollu personal y independencia de les mesmes, cola ellaboración de planes personalizaos d'apoyu. La valoración y concesión de les places ye competencia de la Conseyería de Bienestar Social.

Más información: www.asturias.es