Dende los servicios sociales xestiónense y articúlense distintos servicios y prestaciones que favorezan un desarrollu integral de los y les menores.

Información

Sobre los recursos educativos y d'atención na etapa preescolar: escuelainfantil del colexu San Félix y les aules maternales allugaes nos dos colexos de primaria del conceyu.

Agospiu alternativu

Intenta incorporar a los y les menores a otres formes alternatives de convivencia familiar y nos supuestos nos qu'esta nun sía vidable por nun esistir la unidá familiar o porque, entá esistiendo, presente una situación de merma psicolóxica, afectiva y/o socio-económica que torgue'l so desarrollu y bienestar, buscar el recursu más afayadizu. Dende'l centru de Servicios Sociales tramítase la solicitú, faise la valoración y la propuesta; anque la decisión correspuende al Institutu Asturianu d'Atención Social a la Infancia, Familia y Adolescencia.

• Acoyimientos familiares: el/la menor pue ser acoyíu/ida por dalgún miembru de la so familia estensa qu'axunte los requisitos afayadizos p'atender les sos necesidaes específiques. Tamién pue ser acoyíu/ida por una familia cola que nun tenga parentescu, y que-y facilitaría les atenciones necesaries dientro d'un ambiente familiar axeitáu a les sos necesidaes..
• Centros d'agospiu de menores: los centros de menores, públicos o alcordaos con entidaes privaes ensin ánimu d'arriquecimientu, son un recursu de protección que facilita un contestu de desarrollu a los neños y neñes en situación de guarda o tutela pola Alministración del Principáu d'Asturies. L'adopción de la midida d'agospiu acarria una separación temporal o permanente del padre y de la madre y esixe l'aplicación complementaria de programes empobinaos a la restitución de los neños y neñes al so mediu familiar, la so integración nuna familia alternativa o al desarrollu d'un proyectu de vida independiente.

Programa municipal contra l'abandonu escolar

Establecíu nel añu 2003 en collaboración con tolos centros educativos del conceyu, y coordináu pola educadora social del centru de Servicios Sociales, tien como oxetivu xeneral camudar la conducta d'abandonu pa garantizar l'asistencia regular del alumnáu al so puestu escolar, dando respuestes inmediates a les situaciones que se produzan, coordinando a toles persones profesionales implicaes, fomentando'l sofitu escolar como mediu d'ameyorar les condiciones educatives y rendimientu de los menores y les menores y estableciendo soluciones conxuntes con padres y madres.

Los centros educativos unvien a Servicios Sociales la notificación d'abandonu después de facer los pasos previos: comunicación de la Xefatura d'Estudios a los padres y les madres y intervención del serviciu d'orientación escolar.

Ayudes pal acoyimientu familiar de menores

Información y tramitación de la convocatoria añal de la Conseyería de Bienestar Social d'ayudes a persones físiques pal sofitu al acoyimientu familiar de menores.

Más información: www.asturias.es