La Biblioteca Pública "Carlos González Posada" créase por orde ministerial del 23 d'abril del 1949 magar que nun va inaugurase hasta abril del 1955, ocupando un local na antigua Casa'l Pueblu, agora de Falanxe y el Sindicatu Vertical.

El so primer bibliotecariu foi don Eduardo Noriega Hoyos y el so funcionamientu regúlase por un conveniu firmáu col Centru Coordinador de Biblioteques d'Uviéu, dependiente de la Dirección Xeneral d'Archivos y Biblioteques.

Afítense como funciones del Centru Coordinador, el control, l'asesoría técnica y l'unviu de llibros y per parte'l Conceyu, l'acondicionamientu del local y el so mantenimientu y el sueldu del encargáu/ada, comprometiéndose a una apertura diaria de polo menos tres hores y media.

Nel añu 1959 nómase bibliotecariu a don José González Gutiérrez, que va siguir nel cargu hasta 1964, añu nel que se xubila por enfermedá.

Na década de los 60 la biblioteca tien de contino problemes col local (techu con goteres, paredes despintaes) que son recoyíos en numberoses comunicaciones pol Centru Coordinador al Conceyu al que-y recuerda la so obligación de caltener el local y insiste na necesidá de buscar una solución.

Esta paez ser el treslláu al  Institutu d'Enseñanza Media creáu de recién. Mientres, y debío a les estroces y a la enfermedá del bibliotecariu, el centru permanez peslláu en gran parte del añu 1964.
Pa lo cabero d'esi añu nómase  sustitutu a don José M ª Álvarez Rodríguez que va tar al frente de la biblioteca hasta finales del 1986.

El treslláu al institutu nun llega a facese enxamás porque'l local ufiertáu por Educación ye la metá del hasta entós esistente y el Centru Coordinador refuga la propuesta.

La biblioteca sigue amiyando nun local poco afayadizu y con unos fondos cada vez más anticuaos; solo hai un intentu de remocicala nel 1970 cuando'l Centru Coordinador propón al Conceyu que-yos dean un terrén pa la construcción d'una nueva biblioteca, corriendo l'Estáu cola financiación del edificiu, moblame y aumentu de fondos. De mano'l Consistoriu considera con gran interés la propuesta y promete entamar les xestiones p'algamar un terrén, pero'l proyectu queda pa prau. Coles elecciones municipales democrátiques les coses empiecen a cambiar, como primera midida la biblioteca treslládase a una sala dientro de la nueva Casa Cultura y  entamen a comprar llibros col envís de renovar el fondu.

Nel 1986 convócase la plaza de bibliotecariu/a por concursu oposición y en xineru del añu siguiente toma posesión la bibliotecaria d'anguaño doña Carmen Dintén Sánchez. La biblioteca enancha l'horariu, cómprase la prensa diario y revistes, síguese cola ampliación de fondos, sobre manera'l de consulta y pa neños (mui anticuaos) apúntase al BOE y al BOPA... y entama a organizar la colección.

El númberu d'usuarios/es y llibros aumenta de contino, hasta que'l local nun aguanta más la xuba. Mientres, el Conceyu yá comprare como futuru llar bibliotecariu un palaciu allugáu nel centru'l pueblu y en cuantes lu remocicaron y  iguaron, foi inauguráu como biblioteca'l 20 de mayo del 1998.