Amigos y amigues, en nome de la Corporación de Carreño doivos la bienvenida a esti espaciu renováu qu'abre les puertes del conceyu a toles persones que por unu o otru motivu, decidan visitanos. Carreño date la bienvenida a esti espaciu de diálogu continuu cola ciudadanía.

Carreño tién la vista puesta nel horizonte, esi que'l Mar Cantábricu mos regala tolos díes y que mos dexa mirar p'alantre con optimismu. Conceyu acoyedor, dinámicu, arguyosu de los sos raigaños y trabayador incansable, cuenta con unos servicios públicos de calidá nos que la ciudadanía ocupa'l centru la xestión de los asuntos comunes. Nesti nuevu espaciu puede atopase información útil sobre'l nuestru conceyu, l'ayuntamientu y los distintos servicios municipales.

Esta web nueva, ye adautativa dafechu, afayase totalmente a les pantalles de dispositivos móviles, tanto smartphones como tablets. Dende ella tamién se van poder compartir toles noticies que se publiquen na mesma  al traviés de redes sociales colo que les actividaes municipales van poder llegar más fácilmente a tola vecindá.

El nuesu oxetivu ye garantizar al traviés d'ella l'accesu de la ciudadanía al mayor númberu de trámites y xestiones posibles, de forma tala que l'alministración local s'avere cada vez más, a la realidá de les sos necesidaes.

A los que visiten Carreño, a los que viven en Carreño y por fin, a tolos que sienten Carreño, esta ye la so casa.

Amelia Fernández López

Alcaldesa de Carreño