Estas en:

Xornaes

MAR ADENTRO

Mar adentro ye'l títulu de les xornaes lliteraries qu'añalmente entama'l Conceyu de Carreño, so la coordinación de Teodoro Rubio y d'Antonio Merayo. Anguaño van celebrar la so octava edición y van tener llugar la primer fin de selmana de setiembre, concretamente los díes 5 y 6. Nesta nueva edición quier rescamplar especialmente a la mar, subtitulándose les xornaes La Mar en la poesía urbana y en la narración oral.

 Van participar como ponentes el poeta raperu El Chojín, cola ponencia Olas y adioses (lo que el mar une) y el cuentacuentos Aldo Méndez Camacho cola ponencia Un mar de palabras. La memoria como viaje: el oleaje de los afectos

Anguaño, va rindise homenaxe al poeta Victoriano Crémer, que morrió apocayá (en xunu). Victoriano, unu de los poetes y periodistes más vieyos d'España, nació en Burgos nel 1906, anque siempre vivió en Lleón. Autodidacta, ente les sos cualidaes destaquen una capacidá tremenda de trabayu y el ser quien a reponese de cada caída. Foi unu de los fundadores de la revista Espadaña, que dio cabida a los intereses de la llamada poesía desarraigada de posguerra y canalizó la llucha de toa una xeneración de poetes qu'atoparon nella'l so mediu d'espresión. La so obra poética muévese ente la denuncia de la inxusticia y 'enfotu pola solidaridá.

Recibió la Medaya d'Oru al Méritu nes Belles Artes 2008. Esti gallardón reconocía la so trayectoria nel mundu de les artes, qu'empecipió cola so primer obra Tendiendo el vuelo, publicada nel 1928. Llogró'l Premiu Nacional de Poesía nel 1963 y el Premiu Castiella y Lleón de les Lletres nel 1994, y ente les sos obres figuren Nuevos cantos de vida y esperanza, Libro de Caín, Tiempo de soledad o El último jinete, pola que mereció'l Premiu de Poesía Jaime Gil de Biedma del 2008.

L'homenaxe al poeta Victoriano Crémer, va tener llugar en El Paseín el 5 de setiembre a les 20 hores. Va empezar cola llectura de los sos poemes por 18 poetes, darréu'l cantautor candasín Pipo Prendes va cantar dellos poemes del poeta homenaxáu. De siguío, va proyectase'l documental de Maxi Rey Recuerdo de Victoriano Crémer  y va zarrase l'homenaxe con El Chojín, que rapeará dellos poemes.

Estes xornaes lliteraries tán abiertes al públicu en xeneral. La inscripción ye DE BALDRE, y apúrrese diploma d'asistencia. Si se quier apuntar nes mesmes, puen facelo al traviés del corréu electrónicu: culturaayto-carreno.es o bien nel teléfonu: 985. 87.24.21 (Ref. Cultura).