Ta asitiáu na parroquia d'ElValle. P'aportar al llugar encamentamos pela AS-19, dirección Xixón/Gijón-Avilés, PK 11,500, tómase a la izquierda la carretera CE-5 escontra Santolaya d'El Valle y nel PK 1, Camín de Ron, tómase'l ramal de tierra de la derecha y a unos 200 m. vamos topamos cola placa conmemorativa que recuerda l'allugamientu d'esti campu d'aviación y que foi instalada'l día 20-04-97, onde daquella taben los refuxos.

Les instalaciones, prácticamente inesistentes, fueron usaes polos aviadores republicanos na guerra civil española, tando considerada daquella, tanto pola so situación estratéxica como pol númberu de naves y operatividá, una de les más importantes de les Fuerces Aérees de la República Española en tola franxa norte de la península.

El primer xefe d'esti campu foi Hernández Franch, qu'anguaño vive en Barcelona. Sobre los azulexos de cerámica asitiaos nes ruines de formigón d'unu d'aquellos bunkers, pue lleese 'Este lugar fue testigo del heroísmo de los aviadores de la República Española por su lucha por Asturias y la libertad. Campo de Aviación de Carreño 1937-97'.

El Campu l'Aviación de Carreño, del que namás queda un cachu de la pista dientro del terrén esterior d'una nave industrial de la empresa LUALVA, tenía unes dimensiones de daqué más d'un kilómetru y mediu. Yera de yerba y disponía, amás de la pista fecha de conglomeráu (de piedra machucao) d'unos 42 por 600 m., d'un par de refuxos de formigón y d'un barracón de madera de 12 m. que sirvía de taller d'arreglos, almacén de pieces y montaxe d'aviones.

Nesti campu hubo aviones como "Las Moscas", "Los Chatos", "Folker", "Dragon Rapide" o "Breguet 19". El so númberu, al igual que'l de los pilotos, variaba y oscilaba ente los nueve y la ventena d'aparatos.

La construcción d'esti campu fízose nun tiempu récord, nun mes, con carros de piedres traíos de conceyos fronterizos. Tuvo operativu hasta'l final de la guerra, permaneciendo en funcionamientu dende finales d'agostu hasta'l 20 d'ochobre del 1937. Nun esisten indicadores pa llegar a la zona.