Tán nel barriu El Monte, na parroquia de Llorgozana, y cabo'l depósitu d'agua esistente na zona. Garramos el camín de tierra unos 300 metros. P'aportar al llugar dende la carretera AS-110, Candás-Tabaza, nel PK 8,900, garramos la dirección señalizada como La Barrera-Perán, CE-2 y a unos 1.400 m. tomamos el camín pindiu de la derecha y siguimos unos 350 m. Siguiendo pel ramal de la derecha llegamos al barriu El Monte onde podemos acolumbrar el depósitu. Los viales son d'asfaltu y en bon estáu de caltenimientu.

El castru data de la prehistoria, de 1000 o 650 años AC y ta dientro de la cultura del bronce atlántico. Antaño quedaben buelgues de los pozos y de delles edificaciones dientro de lo que sedría'l  recintu fortificáu. Va años, nel terrén del castru había abandonáu un recipiente monolíticu de piedra caliar, rectangular, paecíu a una gran bañera y qu'usaben pa ritos funerarios. En mayu del 1978, ente los matos, apaeció un hachu de bronce en bon estáu; tenía talón y dos ases pa garrar el mangu Sicasí, d'esti descubrimientu namás queden semeyes, yá que se camienta que lu robaron de la casa rectoral.

Paez ser que'l castru desapaeció dafechu por cuenta de los trabayos pa sacar piedra de la cantera próxima, anque tamién pudo collaborar cola destrucción del mesmu los trabayos fechos pa pasar una canalización d'agua potable de CADASA, onde usaron máquines escavadores.

Anguaño, dende'l depósitu d'agua p'alantre, l'accesu ye cuasi imposible por cuenta de los árboles y matos que nun dexen metese nel llugar. El sitiu ta ensin señalizar. Hai que rescamplar que'l llugar onde taba'l castru ye propiedá de tres persones: José Luis Iglesias, Gloria Priendes y Victoria García.