Asitiaos na c/ Rufo Rendueles, númberu 22, fueron construyíos nel 1923 por orde de doña Generosa García, viuda del propietariu D. Isidoro García.

El maestru d'obres foi D. Primitivo García Cuervo. L'edificiu d'estilu eclécticu ye una más de les fachaes que s'alzaron nel procesu de l'acelerada urbanización de Candás nos años 20.

La distribución ye la típica, con local comercial nel baxu y viviendes nos dos pisos, amás d'una bufarda acristalada -tendal -. Los elementos decorativos más significativos, amás del azulexáu colorao, son les moldures de les ventanes-balcones, la cornisa y l'antepechu del teyáu que presenta la cartela col añu de construcción nel centru y decoratives urnes con pirámides allargaes remataes por esferes.