Ta asitiáu nel barriu El Palacio nu 3 d'El Valle y podemos llegar a dende l'AS-19, Xixón/Gijón-Avilés. Nel PK 11,500 xiramos a izquierda tomando la carretera CE-5 y a 2.500 m., a la izquierda,  podemos acolumbrar el palaciu pela so cara norte.

Anguaño ye conocíu como "Ca Bárcena" y ye propiedá de Ramón Suárez Cuervo. Dizse que dichu palaciu foi propiedá de la condesa de Revillagigedo, que según la historia viaxaba dende les sos posesiones en Pravia hasta Xixón, siempre per tierres de la so propiedá. El palaciu, foi una 'Casa de Pendón y Caldera", yá que daba posada y a la xente que viaxaba; tenía pensión y sitiu pa los caballos.

Na guerra civil, aportó a Cuartel Xeneral de la República porque taba bien cerca d'El Campu l'Aviación de Carreño. Con posterioridá, y según avanzó la guerra, pasó a instalase'l bandu nacional.

El palaciu, dempués de la guerra civil, pasó a ser propiedá de los Díaz-Caneja, que vivíen no qu'anguaño son les cuadres. Dende l'añu 1947 los propietarios actuales son la familia Suárez (los caseros d'antaño) La entrada principal ta escontra'l sur, per onde pasa'l Camín de Santiago o Real.

La edificación data del sieglu XVIII, o inclusive antes, yá que los sos propietarios/es afirmen qu'atoparon una pieza de madera na que figuraba la fecha 1718.

Tien dos pisos y anguaño ta en forma de  'u', anque antaño la so forma yera d'Una 'L'; el pórticu ta aguantáu por columnes. Tien capiya, cubierta con bóveda de mediu cañón. Esta ermita ta dedicada a Ntra. Sra. del Carme, de la que la so primer imaxe foi quemada nel patiu del palaciu mientres la confrontación bélica. Anguaño, conserva dos figures relixoses, una de San Antonio y otra de talla de la Virxe, dambes fueron apurríes pol que fuere párrocu d'El Valle en 15 años, Don Teodoro, que tuvo de posada nel palaciu por dos años. La capiya llegó a acoyer dellos oficios relixosos nos años cuarenta del sieglu pasáu y nella, llegó a oficiar misa en ceremonies 'familiares' hasta feches de bien recién.

Les dimensiones del palaciu son tan grandes que nuna de les sos ales nun vive naide. Ta compuesta por cinco cuartos tremendos y un corredor o cuartu que comunica cola capiya.

Nel centru del edificiu figura una especie de torrexón, conocíu nel pueblu col nome de 'planchador", porque esi yera'l serviciu principal que recibíen 'los señores". El palaciu dispón d'otres munches dependencies y equipamientos, como un pozu artesanu d'agua y un cuartu anexu al inmueble que facía de secaderu de tabacu y, más apocayá, de piteru.

Según paez, d'antiguo yera frecuente esti tipu de cultivos en Carreño y na propiedá llegaron a colgar les fueyes d'una especie d'infraestructura metálica que daba a la entrada principal y que primitivamente constituyó un arcu axardináu.