En Carreño, de la mano del románicu y dende la primer metá del sieglu XII, fáense murales venceyaos al ámbitu de les ilesies. Ye pa finales de los 70 cuando surde en Candás, coincidiendo cola celebración de l'Alborada, una actividá que consistió en plasmar nes muries de la villa distintes escenes faciendo un homenaxe a la mesma. Esta iniciativa, que de mano foi de calter priváu, fomentada pola cofradería "El Alba", caltúvose a lo llargo los años chiscando arquitectures con dellos colores y mensaxes.

Asina, Candás empieza la so colección de murales ente 1979 y 1982, periodu que coincide col de máxima producción. Y cada añu, pal mes de setiembre y coincidiendo cola celebración de l'Alborada, diben incorporándose más murales nesti singular Muséu de pintura albentestate.

Dientro d'esta interesante amuesa tenemos d'estremar claramente dos etapes:

Primer etapa; L'orixe: 1979-1982

Esta actividá naz por iniciativa de la cofradería "El Alba", enmarcada nos actos de l'Alborada. Cada añu pal mes de setiembre y coincidiendo con esta celebración, dellos autores realizaben murales en Candás. Estos artistes invitaos, veníos de tol mundu, facíen les sos obres de baldre pa depués cedeles al pueblu de Candás. Esta primer etapa termina cuando la confradería "El Alba" cesa la so actividá nel 1982.

Segunda etapa; L'afitamientu Consolidación: 1985-2005

Aquella actividá, aniciada pola cofradería "El Alba", ye retomada nel 1985 pol Conceyu de Carreño. L'encargu al artista local Alfredo Menéndez de dos murales pal esterior de la fábrica d'Albo, sirvió pa recuperar y siguir la idea del naguáu Muséu de pintura albentestate de Candás..

Anguaño, este ye un muséu vivu que sigue ampliando la so colección. Trátase pos d'un conxuntu de numberosos murales realizaos por pintores notables de delles procedencies:

• Alfonso Iglesias
• Miguel Ángel Lombardía
• Alfredo Menéndez
• Monteserín
• J.M. de la Riera que fizo so obra nel1979
• Nel 1980 pintaron Claudio Favier, Manolo Llinares, Antonio Cuervas-Mons, Monshen Guirguis y Alipio
• Nel 1981 ficiéronlo Alberto Moreno, Vicente Santarúa y Paco Arenas
• Nel 1982 Rogelio Ponte, Alfonso Abelenda, Celestino Cuevas y Jerry Sheerin, etc.
• Y de recién, el lluanquín Vladimir González plasmó la so obra nel muenye de Candás.

Del mesmu artista hai otru mural estraordinariu na paré de la escalera del camarín del Santísimu Cristu, con una representación impresionante de la sagrada imaxe na mar d'Irlanda colos pescadores candasinos.

Tampoco podemos escaecer otres obres como son: "Alborada", "Centenario de la Salve", "Estrella de los Mares", "Conjuro a la Mar", "Barcas", "Puño de Marinero"... y munches otres de más recién como "Pasado Presente" que completen esti muséu fabulosu.