Ta asitiáu nel barriu El Fondo, Quimarán/Guimarán, a unos 300m. de la capiya de Nuestra Señora de los Remedios; penriba, escontra El Monte Areo.

Data del sieglu XVIII y venía de Les Mariñes, Villaviciosa. Anguaño pertenez a "Pepe l'Estancu".

El molín foi reconstruyíu nel añu 2000 con una subvención de la Conseyería de Cultura del Principáu d'Asturies.

Paez ser que dexaron de moler nel mesmu sobre l'añu 1950; nel so interior y en mui bon estáu de caltenimientu tán los molares, el brandal y la moxeca; el rodendu ye de castañu.

Esti molín ta contempláu nel inventariu d'elementos etnográficos del Plan Director pa la promoción cultural d'El Monte Areo dirixíu pol doctor Miguel Ángel de Blas Cortina. Ye un molín de cubu con una construcción de planta cuadrada y cubierta a dos agües.