Les tres atalayes naturales d'El Monte Areo, dende onde se pue columbrar unes vistes fantástiques son "La Peña Tocente o del Silenciu", "La Peña'l Carru" y "Les Paseres del Visu".

Peña Tocente o del Silenciu

Esta peña ta asitiada sobre Villar, en Quimarán/Guimarán, al llau derechu viniendo per Puao. Forma parte de La Sierra del Areo y conozse tamién como La Peña del Silenciu, xunto con La Peña'l Carru formen los cuetos de peñes de la sierra enantes mentáu.

Esta peña foi bautizada polos romanos y debe'l so nome a que dende ella nun se siente ruíu nengunu, namás el cantar de los páxaros y el murmuriu del fontán próximu.

Peña'l Carru

Ta allugada sobre Santolaya, n'El Valle, nel cantu septentrional d¿El Monte Areo, nel principiu de la gran campa no más alto de "El Yanu" onde tán dellos túmulos d'El Monte Areo. Dende ella pue columbrase un estensu sector marítimu de la contorna mariniega de Peñes.

Ta asitiada na caleya La Gabiana, daquella un trabayosu camín empináu que pasaba ente los dos peñes. Yá apaez denominación tala nel apéu de la catedral d'Uviéu del 1762, cuando fala de les llendes de la parroquia.

Nesta zona d'El Monte Areo entá queda dalguna buelga de la calzada romana o camín real de la mesa.

Les Paseres del Visu

Na llanada cimera del monte, poco primero d¿empecipiar la lladera sur pela que baxa La Cuesta'l Visu escontra Serín, hai una zona "Les Paseres" que constitúi una estupenda atalaya natural escontra la cuenca central asturiana y el sector mediu del Nalón, nuna inmensa panorámica llendada al meudía pola bayura caliar de La Sierra del Aramo.

Dende esti sitiu y bien lloñe, vense a les clares,  más de 10 llegües de contornu y rexistru, de munchos conceyos.