Allugada na paré onde ta la entrada principal de la ilesia de Santolaya d'El Valle, concretamente a la derecha y dientro del cabildu; pero esti nun foi'l so allugamientu orixinal, enantes taba dientro de la ilesia, pero por cuenta de la construcción de los retablos dexaba de ser visible polo que se decidió'l so treslláu.

Aportamos al llugar dende l'AS-19, Xixón/Gijón-Avilés; nel PK 11,500, tomamos la esviación a la izquierda y después la carretera CE-5 con dirección Santolaya d'El Valle que conduz directamente a la ilesia.

Consta d'una llábana de piedra pizarroso con una inscripción en lletres mayúscules de tipu visigodu. Esta llábana, del añu 951, tien fechada la inscripción d'esta nel añu 989. Perteneció ensin dulda a una ilesia desapaecida allugada n'El Monte Areo. La capiya de San Pedro y San Pablo. Tuvo como misión primera señalar la presencia de les reliquies de dicha capiya, que darréu fueron llevaes a la ilesia d'El Valle nel 1874. La piedra epigrafiada mide 43 x 44 cm. y la so caxa d'escritura 37 x 39 cm. La so escritura va toa en mayúscules, predominando la uncial como rasgu redondu rústicu.

La inscripción de la llábana traducida al asturianu ye:

"Pol honor de San Pedro y San Pablo Apóstoles hai guardaes nel altar les reliquies de San Tirso, de Santa Águeda, de Santa Pelaya, y Marina Virxe. Nesti templu qu'edificó Alfonso, fíu del príncipe Froilán so la era DCCCCLXXXIIII a día terceru (de...)"