Ta allugada nel barriu El Fondo de Quimarán/Guimarán, nel paraxe conocíu como La Nozalera por cuenta de la esistencia de dellos nozales nel llugar años tras.

Aportamos al llugar dende l'AS-19, Xixón/Gijón-Avilés, PK 6,300, onde tomamos a la izquierda la carretera CE-6 dirección Serín y a unos 3.5 km. entramos nel barriu El Fondo, garramos a la derecha'l camín asfaltáu y a unos 200 m. alcontramos la Ilesia.

El templu ye de forma rectangular y cabecera cuadrada, mui del estilu popular asturianu. Sufrió delles reformes, especialmente nel cabildu, que se sustituyó por un cuerpu cúbicu prácticamente zarráu y adosáu nel frente de la fachada. Esta ilesia foi quemada na guerra civil española y reconstruyida darréu. Foi una de les donaciones feches pol rei Alfonso III 'El Magnu' y la so muyer la reina Ximena a la ilesia d'Uviéu.

Nel so interior hai un llenzu de la Virxe de Guadalupe que foi donáu por un fíu de la parroquia, un emigrante en tierres mexicanes; esti llenzu foi restauráu sobre l'añu 1996.

Coles mesmes, tamién esiste un panteón parroquial de los Villar, que data del sieglu XVIII, concretamente del añu 1819. L'últimu enterramientu foi'l de Francisco Quirós de Villar el 3 de xunu del 1919. Nesti añu quedaron prohibíos los enterramientos nel interior de la ilesia, pasando a facelos nel campusantu apagáu al templu.

La festividá de San Esteban, patronu de Quimarán, celébrase'l 26 d'avientu.

Otra festividá que se celebró dellos años na Ilesia en cuestión foi'l "Día de la Raza' el 12 d'ochobre, entamada en collaboración cola Casa de México n'Asturies.