Esta fonte, de referencia al mundu de la mitoloxía pol elementu especificativu del so nome, vien de les conseyes mitolóxiques que nella s'alcuentren: les xanes.

Ta asitiada nel prau conocíu como'l pastu Torío, n'El Valle Baxu, el nucleu de población más grande de la parroquia d'El Valle. Ye de titularidá pública, con llavaderu de dos piedres. Les lleendes cuenten qu'en La Fonte les Xanes esistíen delles xanes qu'amás de llavar les sos ropes cuidaben les de les vecines que de nueche dexaben la ropa tendío albentestate.  Al dir recoyelo al riscar, les muyeres atopaben la ropa plegao y seco, magar que tuviere'l verde moyao pola orbayada. Yeren les xentiles xanes les qu'ensugaben y recoyíen curioso les ropes.

Esta fonte ta allugada nel antiguu camín de pelegrinos a Santiago pela mariña asturiana al so pasu per Carreño, na Cuesta Ramos, camín ampliu que baxa del Areo al nucleu de Santolaya, travesando los núcleos de La Vereda y Xanes. Esti camín conozse como "Los Ramos" porque na xubida a esta zona hai y, de xuru hubo, munchos más árboles y arbustos.

Nuna de les piedres del llavaderu pue vese grabáu'l nome de "Herminia", que yera una señora residente na casa más próxima a la fonte, Ca Pepemingo, que diariamente diba llavar y que, como yera costume antaño, cada llavandera marcaba la so piedra porque siempre intentaben usar la mesma y mirar pol caltenimientu de la so llosa.