Ta asitiada n'unu de los estremos de la finca de La Quinta Clarín, nel barriu de la La Rebollada (dende l'AS-19 nel PK 11,300, camín particular asfaltáu escontra la derecha). Foi remocicada con un taller d'empléu municipal.

Tien fonte, llavaderu, sitiu pa esclariar y bebederu. Nesta fonte xugaba y garraba agua Elisa, la fía del famosu escritor "Clarín". La historia d'esta fonte ta bien xunida a la familia Alas.

Nos años nos que Clarín tuvo na finca, la fonte yera un enclave social frecuentáu principalmente poles muyeres y los neños de la redolada. Na nueche máxica de San Xuan los vecinos engalanaben esta fonte, enllenábenla de flores y cantaben al rodiu d'ella.

Hai que señalar tamién, la proximidá d'esta fonte a la ilesia de Santa María de Llorgozana.