Ye una fonte pública que data del 1900, con una estética d'inspiración clásica; ta rematada con frontón triangular onde ta grabáu l'añu de construcción. Foi remocicada por un taller d'empléu municipal. L'agua va directamente d'un manantial poro, nun ta sometío a control sanitariu nin procesu de cloración dalgunu.

Nel cuerpu de la fonte hai un resalte de forma cuadrangular coles esquines acanalaes y nel so centru hai un rosetón cenciellu del que sal el cañu.

Ta asitiada nel barriu La Cespedera, na parroquia de Quimarán/Guimarán, nuna cuesta a la vera'l camín antiguu que diba pa Xixón/Gijón, per un llugar qu'anguaño, y por tradición bien antigua, conocemos como "San Pablo". Recibe'l nome de San Pablo porque equí tuvo una de les tres capiyes que marcaron espiritualmente les rutes del Areo. D'esta ermita de los apóstoles Pedro y Pablo, alzada antes del sieglu X a la solombra del castiellu del mesmu nome, nun queda más qu'una alcordanza desdibuxada y unes nobles piedres llabraes usaes pa la construcción de les corralaes de les finques del llugar y d'un establu que foi propiedá de Ramón Pérez "Ramón de Pire".