Tán nel barriu Barreres númberu 7, en Priendes. Pa llegar a elles garramos l'AS-19 Xixón/Gijón-Avilés y poco depués de pasar el cruce de L'Empalme, entramos nel barriu, onde a mano derecha y apegáu a la carretera podemos ver esti edificiu singular.

Esta construcción inauguróse'l 9-05-1905, pero les obres, dirixíes pol arquitectu Bellido, entamaron dos años primero, en xineru del 1903. Trátase d'un edificiu perguapu y espléndidu de piedra visto y compuestu por un cuerpu central y dos llaterales.

Nel momentu de la construcción, el primer pisu yera pal maestru o la maestra y taba rematáu por un campanariu con una campana de 90 kilogramos de pesu. Los dos cuerpos restantes, de planta baxa, diben valir d'aules independientes pa ún y otru sexu. No cimero del frontispiciu empotráu na paré ta l'escudu nacional y sobre les puertes d'entrada de dambes escueles, suxetes a los mástiles, ondeaben les banderes d'España, qu'a partir d'entós apaeceríen en tolos edificios escolares de nueva construcción y que se desplegaben nes hores de clase en virtú de lo ordenao por una RO del 1893, hasta entós non cumplida polos apuros de les escueles.

La inauguración d'estes escueles, que diben usales los neños y les neñes de los pueblos d'Albandi y Priendes, foi un actu que significó un acontecimientu estraordinariu non solo pa dambes dos parroquies, sinón pa tol conceyu.

Al actu asistieron numberoses persones presidíes pol vicerrector de la Universidá d'Uviéu, D. Fermín Canella Secades y l'alcalde de Carreño, D. Higinio Fuentes, el Conceyu, la Xunta Local d'Instrucción Primaria, el cleru y el diputáu provincial D. Juan Estrada Nora.

Anguaño, l'edificiu ye la sede del viveru d'empreses "EnPrendes", esperando ampliar los sos usos nel futuru.