Ansí nomamos a una llinia qu'empezó a construyise allá pel añu 1934 y na que darréu del añu 1960, ficieron trabayos de rebaxáu de la caxa fecha enantes y desaniciaos los pasos a nivel, alzando pontes a lo llargo del so percorríu.

Esta llinia, enxamás llegó a tar operativa, nin siquier llegaron a poner les víes; lo único construío foi la caxa que diba allugala y les pontes.

Recibe'l nome de "L'Estratéxicu", porque yera una llinia que diba xunir la localidá de Xixón/Gijón con El Ferrol, pasando per Prevera, Quimarán/Guimarán, El Valle, Ambás, Tamón, Tresona y Avilés. Como característica podemos dicir qu'esti ferrocarril diba xunir esos sitios ensin pasar pela mariña.

Pa ser a ver la caxa que diba abellugar la llinia esisten dos puntos:

• Dende l'AS-19, Xixón/Gijón-Avilés,  nel PK 13,100 onde'l barriu Posada nu 10 de Llorgozana garramos el camín a la izquierda y a unos 600 metros aproximao, llegamos a una de les pontes construyíes y que ta na zona conocida como "La Curtia", onde amás, vamos poder ver la caxa qu'anguaño tamos remocicando con un taller d'empléu municipal.
• Otru sitiu ye circulando pela AS-19, Xixón/Gijón-Avilés. Nel PK 11,500, garramos la CE-5, dirección Santolaya (El Valle) y a unos 700 metros podemos ver otra ponte y la caxa construyida; el llugar ye conocíu como "El Camín de Ron".