Ta allugáu nel barriu El Monte, de Llorgozana. Podemos llegar dende l'AS-110, Candás-Tabaza, y nel PK 8,900 garramos la carretera CE-2, La Barrera-Perán y en circulando per ésta 1.400 metros garramos un camín a la derecha asfaltáu y una rampla pronunciada; a unos 600 metros llegamos a una cume onde tala edificación.

Ye un edificiu estupendu que consta d'escuela pa neñes, escuela pa neños, casa pa la maestra y casa pal maestru.

L'apariencia ye d'un edificiu cuidáu d'estilu eclécticu con una portada na exa decorada.

Esta construcción fízola Manuel González Martínez, que la construyó ente los años 1920 y 1922. Esta persona venía de Puerto Rico, d'onde pue venir el so estilu indianu. El so constructor foi nomáu fíu predilectu del pueblu (por alcuerdu del Conceyu), por collaborar a esgaya a la reforma y meyora de la ilesia amás d'ayudar económicamente a facer delles obres nel conceyu y pola so construcción y donación del edificiu de les escueles de Llorgozana. La entrega de les escueles pol filántropu D. Manuel González Martínez, fízose a les 12 de la mañana del día 8 d'ochobre. Asistieron al actu, xunto col alcalde presidente del Conceyu, el gobernador militar xeneral, Losada; l'obispu de la diócesis, Juan Bautista Luis Pérez; el maxistral de Cuadonga, D. Luis Miranda y otres munches autoridaes locales y provinciales, con tol pueblu de Llorgozana.

Destapóse una llábana de mármol n'homenaxe al apurridor, con esta inscripción::

«Escuelas nacionales: Al Excmo. Sr. D. Manuel González Martínez. Dedican este recuerdo los vecinos de Logrezana para perpetuar la memoria de la fundación de este edificio en el año 1923»

Anguaño l'edificiu caltién el so usu escolar nuna parte, y les otres partes tán dedicaes a actividaes socioculturales de la parroquia. Cuenta con una aldea dixital ( telecentru rural), unos espacios dedicaos a la sede de l'asociación de vecinos 'Logrezana Existe', una zona acondicionada pa cursos y en construcción una  biblioteca pequeña.