Asitiada nel barriu de La Tabla, n'El Regueral, la zona más rural de la parroquia de Candás. Llegamos a ella al traviés de la CE-1.

Pertenez a la familia de Genaro Rosalía y ye una gran casona de campu d'estilu eclécticu y aire tradicional; ta allugada na mesma esplotación agropecuaria. Xuntu coles traces d'arquitectura tradicional (estructura rectangular, entrada en forma de portalón, aleru, cortes apegaes a les cases, paneres, etc.), presenta otros rasgos novedosos, como son la presencia de cuatro balcones nel segundu pisu de la fachada, la galería de triple faceta nel llateral y la decoración  a base d'azulexos blancos y azules. Bien interesantes son les falses ventanes d'inspiración marinera, anque tien una finalidá agrícola-ganadera. Tien esta casa tamién interés como amuesa de la llarga pervivencia d'esti tipu d'edificaciones hasta bien entráu'l sieglu presente.