Asitiada na cai Bernardo Alfageme, 33, foi construyida por D. Mariano Laspra González-Arberú, propietariu y presidente de l'Audiencia de Cáceres. Entá ta ocupada polos sos descendientes. Esta casona modelu tradicional foi oxetu d'una reforma interior nos años 40. Mercáron-yla a un indianu cuando namás tenía los cimientos y de mano, pensaben usala namás como vivienda de branu al cuidáu d'unos caseros (edificiu anexu). Al final, acabó tresformándose en vivienda permanente.

La casa ta rodiada d'una finca amplia enforma con un xardín qu'entá caltién los restos d'una escalinata y d¿un cenador arrodiáu por una valla. L'edificiu, de forma cuadrangular, tien dos pisos con guardilles n'ángulu rectu que conformen un teyáu irregular y de múltiples vertientes. El teyáu ta rematáu por un aleru de madera que ye prácticamente l'únicu elementu ornamental, amás del ennoblecimientu d'esquines y remates con sillares imitaos. La fachada d'accesu ye bien simple y da a la carretera de Lluanco/Luanco. Esta fachada, antes de la reforma de los años 40, contaba con un gran balcón circular.

La parte posterior, orientada al meudía, presenta una entrada con soportal sostenida por pilastres y enriba, una galería corrida. La distribución interior resulta tamién bien cenciella, con cuatro o cinco cuartos per pisu que contienen entá parte del moblame orixinal decimonónicu y de principios del sieglu. En feches próximes, va ser remocicada pa la creación de nueves viviendes.