Ta asitiada na avenida Fernández Ladreda 3. Construyóla la familia Muñiz García nel 1919-20. Nel branu del 1918, D. Jovino Muñiz Velasco, suegru del indianu afincáu en Cuba, D. José Muñiz García, solicitó'l permisu inicial pa zarrar el terrén nel que depués edificó la casa. Hai que pensar que se trata quiciabes del meyor y unu de los últimos trabayos del maestru d'obres, José García Prendes. Ye una mecedura orixinal d'estilu eclécticu más puru, col de los "cottages" centroeuropeos y dellos toques del estilu montés (escalinata, distribución interior).

Presenta tres cuerpos, unu central avanzáu y de dos pisos que se correspuende cola antoxana d'entrada y dos ales llaterales de namás un altor, lo que-y da una configuración que ruempe esti enclín dominante escontra lo cúbico y que s'alvierte en casi toles demás viviendes de Carreño.

El teyáu central ye planu, con dos cayíes llaterales y enllárgase hasta cubrir col mesmu inclín les ales d'un solu pisu. La entrada doble resuélvese con una escalinata abalaustrada y curva que da accesu a una antoxana acristalada con una decoración de zócalu d'azulexos. L'interior distribúyese de manera paralela y abondo simple, siguiendo un tabique que sal dende'l suétanu, que s¿alza sofitándose nunos orixinalísimos arcos rebaxaos que-y dan una apariencia de bodega meridional bien llamativa.

La decoración esterior sigue los cánones eclecticistes de ménsules, goles, llinies d¿impostes, triglifos, etc. Too mecío con elementos monteses como'l bistechu y el tipu teyáu. Nel interior, caltiénense les maderes nos zócalos, los papeles estampaos na paré y les moldures de los techos y plafones de llámpares de cuando foi construyida la casa, según un moblame d'estilu asturianu y d'años 20, que faen d'esta vivienda una de les meyores muestres de "hotel años 20" de tol conceyu.