Asitiada nel barriu de Bardiel, esta casa construyóla nel 1925 un indianu que fizo fortuna en Cuba, D. Facundo Junquera, pasando posteriormente a los herederos: Dª Ramona García Junquera y D. Aurelio González López. Por testimonios orales sabemos que'l constructor foi'l maestru d'obres de la zona (que recibió'l nomatu de "L'Estanqueru"), anque namás siguió les indicaciones y los proyectos ideaos pol propiu dueñu.

La casa sigue un estilu eclécticu sobre casa tradicional. Ta construyida nun sitiu altu xunto cola casa de los caseros, la panera, y un almacén. La estructura ye de planta rectangular de dos pisos, con bufarda nún de los llaos y teyáu a dos vertientes. La casa tovía integra la cuadra na estructura xeneral, anque de forma marxinal; fízose la estancia pal ganáu nos años 40 y pa nun desdicir del conxuntu dióse-y la mesma forma esterna qu'a la vivienda col basamentu de piedra, les muries llucíes, les ventanes-balcones remataes pola moldura y les esquines marcaes con falsos sillares.

Por eso podemos dicir que ye una mezcla a la vez del modelu más tradicional con tolos nuevos sistemes, bien sían estos los d'adornu, la presencia grande de vanos o los materiales (rexes, moldures, etc.). L'interior, de distribución cenciella, xune los dos pisos per una  escalera modernista y preciosa, de madera y fierro. Ye una obra que no tocante a la distribución, los materiales, la resolución de sistemes constructivos y demás, remite de contino a les fórmules usaes na Quinta Chor y nes otres quintes d'indianos del conceyu