La escuela antigua de Quimarán/Guimarán-El Valle foi construyida nel añu 1891. Daquella, nel momentu de la so creación, yera una escuela pa neños con usu esclusivu pa esti fin y posada pal maestru.

Fundóla y construyóla D. Fructuoso Busto, natural y vecín d'esta parroquia, que volvió arriquecíu de la so estancia en L'Habana, a la qu'emigró de mozu.

Esta casa-escuela ye un edificiu tremendu d'estructura fuerte, dos pisos, patiu, campanariu con campana, con moblame y material docente; pasó a propiedá municipal per aciu de la donación del fundador.

A los pocos díes d'inaugurar la escuela de neños, los vecinos de diches parroquies solicitaron al Conceyu la creación urxente de la de neñes, que foi aceptada apurriendo pa ello 420 pesetes del presupuestu municipal, pero l'arriendu del local y l'axuar teníen de dir al cargu de los solicitantes.

Poco tiempu dempués y por cuenta de les protestes de la maestra poles instalaciones tan poco afayadices y la falta d'una vivienda pa la so persona, la escuela de neñes peslló. A los ocho meses volvió abrir pa zarrar otra vuelta poco dempués. Finalmente, apañóse una parte de la escuela de los neños pa les neñes.

Esta solución provisional siguió en funcionamientu hasta qu'en setiembre del 1924 foi axudicada la construcción del edificio nuevu al contratista candasín D. Benjamín García Fernández, que construyó la escuela apegada a la de neños, constituyendo namás un cuerpu al qu'aportaben pela mesma puerta.

A la so inauguración oficial en setiembre del 1925, asistió tol pueblu y l'alcalde de Carreño, daquella D. Jesús García Prendes.

Estes escueles vieyes son agora viviendes. L'edificiu ye propiedá de les hermanes García López. Esta familia dio los terrenos onde se construyeron les escueles nueves, nel barriu de La Vega, n'El Valle, cambiando col Conceyu de Carreño'l terrén pa edificar les escueles nueves pol edificiu de les vieyes.