Los primeros pasos pa la construcción de les escueles d'Ambás diéronse en xunu del 1909 cuando D. José Bango León solicitó llicencia d'obra nel Conceyu. La escuela d'Ambás, construyida nel barriu de Güerno, foi una de les munches aportaciones que los hermanos Bango, emigrantes a Cuba, ficieron al conceyu. Per un llau, D. Álvaro, que foi'l qu'apurrió la mayor parte de les perres y per otru llau, José, que foi'l que tuvo a pie d'obra hasta que remataron l'edificiu.

La edificación nun ye la clásica d'aquellos años, sinón que se trataba d'una escuela de namás un cuerpu y un local únicu d'enseñanza pegáu y onde taba allugada la vivienda pa los  maestros o maestres. Amás, contaba con campanariu y escudu nacional na fachada.

Cuando les obres remataron en xineru del 1913, D. José Bango presentóse na Casa Conceyu y fizo los trámites necesarios pa dar la escuela al conceyu, que diez años dempués, como'l restu d'escueles de la zona, pasó al Estáu.

L'edificiu nun caltién l'usu escolar; los neños y neñes de la parroquia d'Ambás van a escuela en Quimarán/Guimarán ' El Valle. Estes escueles vieyes fueron remocicaes pol Conceyu de Carreño y caltienen un usu sociocultural, siendo la sede de l'asociación de vecinos y vecines de Santiago d'Ambás.